பங்களாதேஷின் பாய்ச்சல்...!

ம்ம்ம்...டெஸ்ட் போட்டித்தொடர் கோப்பை எம் வசம்.....!

இந்தியா வென்றால் இணையம் எல்லாம் அலறும். தோற்றால் கதறும். அதோடு நக்கல் பதிவுகளும் பளிச்சிடும். ஆஸ்திரேலியா வென்றால், மீண்டும் அசத்தல் என்று அதிரடி பதிவுகள் வரும். இலங்கை வென்றால், அவர்களுக்கு என்னவோ இப்ப வெற்றிகள்தான் அடிக்கடி என்பது போல கட்டுரைகள் வரும். ஆனால் பங்களாதேஷ் வென்றுவிட்டது. எங்கும் எதிலும் பதிவுகளோ ஆர்ப்பாட்டங்களோ இல்லை. காரணம் ஒன்று அது பங்களாதேஷ் தானே என்கிற இளப்பம். இரண்டாவது அது பெற்ற வெற்றி மேற்கிந்தியரின் இரண்டாம் தர அணியுடன் தானே என்ற ஏளனம்.

பங்களாதேஷ் அணி டெஸ்ட் மற்றும் ஒருநாள் போட்டிகள் இரண்டிலும் மேற்கிந்தியரை வாரிச்சுருட்டி விட்டது. டெஸ்ட் போட்டிகளில் 2-0 என்றும் ஒருநாள் போட்டிகளில் 3-0 என்றும் WHITE WASH அடிப்படையில் மேற்கிந்தியரை மண்கவ்வச் செய்தது.

ஒரு காலத்தில் கிரிக்கட்டின் ஜாம்பவான்கள் மேற்கிந்தியர்கள். அதுவும் அவர்கள் மண்ணில் அவர்களை அசைப்பது கடினம். அவர்களின் எகிறுப்பந்துகளுக்கான ஆடுகளங்களில் ஆசிய அணிகள் உட்பட அனைத்து அணிகளும் தடுமாறித்தான் இருந்தது. விக்கட்டுகளை வீச்சாளர்கள் பதம்பார்க்கிறார்களோ இல்லையோ துடுப்பாட்டக்காரர்களை பௌன்சர் பந்துகளால் மிரட்டுவர். இதனால்தானோ என்னவோ விக்கட்டுகள் எடுப்பது அவர்களுக்கு ஒரு பொருட்டாக இருக்கவில்லை. துடுப்பாட்டமும் அதிரடிதான். அவர்கள் ஆடும் பாணி எல்லோரையும் விட வித்தியாசமானது. எல்லோரும் ஜாம்பவான்கள். அடித்து நொருக்கும் வல்லமை படைத்தவர்கள்.

ம்ம்ம்...ஒருநாள் போட்டித்தொடர் கோப்பையும் எம் வசம்.....!!

ஆனால் இப்போதைய நிலைமை தலைகீழ். குறிப்பாக 1990 களின் ஆரம்பத்தில் இருந்து இந்த சரிவினை மேற்கிந்தியர்கள் சந்தித்து வருகின்றனர். பந்துவீச்சில் ஓரளவு அசத்தினர். அதுவும் அம்புறோஸ், வோல்ஷ், பிசப் ஆகியோரின் ஓய்வுக்கு பின்னர் அதிலும் அவர்களுக்கு சரிவே. ஆங்காங்கே லாரா தனி ஒருவராக துடுப்பாட்டத்தில் பிரகாசித்து அவர்களின் துடுப்பாட்டம் இன்னமும் மறையவில்லை என காட்டுவார். அவரோடு சந்தர்போல் உம் தம்பங்கினை சரிவர செய்தார். இப்போதும் செய்தும் வருகிறார். இவைகளைத் தவிர மேற்கிந்தியரின் சாதனைகள் குறிப்பிட்டுச் சொல்லும்படியாக இல்லைத்தான். காரணம் தேடிப்போனால் நிறைய இருக்கிறது. அவர்களுடைய கட்டுப்பாட்டுச்சபையினுடைய அக்கறையின்மை காரணமாக இருக்கலாம் என எண்ணுகிறேன். அதேவேளை அந்த அணி வீரர்கள் அனைவரும் விளையாட்டாய் விளையாட்டாய் விளையாடுவது. இதுதான் அவர்களின் பலமும் பலவீனமும். இன்னும் நிறைய காரணங்களை சொல்லிக்கொண்டே போகலாம். இது பற்றி பின்னர் ஒருமுறை பார்க்கலாம்.

பங்களாதேஷ் அணியை பொறுத்தவரை எதிர்பார்ப்புகளோ அழுத்தங்களோ அற்ற அணி. அவர்கள் தோற்றாலும் அவர்களுக்கான விமரிசனங்கள் குறைவாகவே இருக்கும். அது அவர்களைப் பொறுத்தவரை ஒரு கவலையற்ற விடயம். ஆனால் பெரிய அணிகள் அவ்வாறில்லை. தோற்றால் போதும் ஊடகங்களோ ரசிகர்களோ வறுத்தெடுத்துவிடுவார்கள். மிகுந்த அழுத்தம் அவர்களுக்கு சிறிய அணிகளுடன் விளையாடும் போது இருக்கும். ஆனால் அவர்கள் இலகுவில் வெற்றி பெற்றுவிடுவார்கள் காரணம் அவர்களின் அனுபவம். கத்துக்குட்டிகளாக இருக்கும் சிறிய அணிகள் பெரும் அணியுடன் விளையாடுகிறோம் என்ற பயத்திலேயே விளையாடுவார்கள். வெற்றிக்கான ஒரு வாய்ப்பு இருந்தால் என்ன விலை கொடுத்து என்றாலும் பெறத்தயங்காமல் விளையாடுவார்கள். இதற்கு நல்ல உதாரணமாக அமைந்த போட்டிகள் தான் அண்மையவை.

இந்த போட்டிகளை கவனித்தவர்களுக்கு தெரியும். முதலாவது ஒருநாள் போட்டியில் முதலில் பங்களாதேஷ் அணி துடுப்பெடுத்தாடி மேற்கிந்தியரை அசத்தலான பந்துவீச்சில் துவைத்தெடுத்துவிட்டது. அடுத்த இரண்டு போட்டிகளிலும் விரட்டினார்கள் அவர்களின் ஓட்ட எண்ணிக்கையை. இரண்டும் பெரிய இலக்குகள். அவரவர் தங்கள் தங்கள் பங்கிற்கு துடுப்பெடுத்தாடி அணியை கரைசேர்த்தனர் வெற்றியை நோக்கி. இரண்டாவது டெஸ்ட் போட்டியில் இருந்து அணியை வழிநடத்தி ஒருநாள் போட்டித்தொடரிலும் வெற்றிக்கனியைத் தேடித்தந்த பெருமைக்குரிய அணித்தலைவராக ஸகிப் அல் ஹசன் திகழ்கிறார். மிக இளம் வயதிலே இப்படி ஒரு வெற்றியைத் தேடிகொடுத்திருக்கிறார். முன்னாலே இருந்து வழிநடத்தி சகலதுறைகளிலும் பிரகாசித்தார்.

இப்போதைக்கு பங்களாதேஷில் நானே ஹீரோ....!

பங்களாதேஷ் டெஸ்ட் அந்தஸ்து பெற்றது 2000ம் ஆண்டில். இன்று வரை அது 61 டெஸ்ட் போட்டிகள் விளையாடி இருக்கின்றது. இதில் கடைசியாகப் பெற்ற வெற்றிகளுடன் அது மொத்தம் 3 போட்டிகளில் வென்றுள்ளது. அதில் இறுதியாக பெற்ற வெற்றி ஒரு தொடர் வெற்றி. அதுவும் வெளிநாட்டு மண்ணில். பொதுவாக ஆசியர்கள் வெளிநாட்டு மண்ணில் தொடரை வெல்வது மிகவும் சவாலான விடயம். இப்போது பங்களாதேஷ் அணி அதனை சாதித்துவிட்டது. அவர்களுக்கு இப்போ உளவுரன் அதிகாமாகி இருக்கும். இது அடுத்துவரும் போட்டித்தொடர்களில் நிறைய எதிர்பார்ப்புகளைக் கூட்டும். அடுத்து வரும் தொடர்களை அவர்கள் எவ்வாறு அணுகுகிறார்கள் என்பது சவாலான விடயமே.

மேற்கிந்திய அணியைப் பொறுத்தவரை அந்த அணி இரண்டாம் தர அணி என்ற ஒரு நிலை இருக்கிறது. ஆனால் அதில் அனேகம் பேர் முன்பு தேசிய அணிக்காக விளையாடி இருக்கிறார்கள். அனுபவம் குறைவுதான். அதுவும் வங்க தேச அணிக்கு ஒரு வாய்ப்பாக அமைந்தது. அதை அவர்கள் நன்றாக பயன்படுத்திக் கொண்டார்கள். எது எவ்வாறாகினும் பங்களாதேஷ் வென்றுவிட்டது. அவ்வளவுதாங்க. இனி எவ்வாறு இந்த வெற்றி முகத்தை தக்கவைக்கிறார்களோ என்று பார்ப்போம்.

அரையிறுதியும் இறுதியும்.....!

மேற்கிந்தியாவின் தோல்வி

========================

வெற்றிக்களிப்பும் சோக வடுவும்

நேற்றைய 20-20 அரையிறுதிப்போட்டியில் மேற்கிந்தியா தோற்க வேண்டும் என்று விளையாடி அதில் வெற்றி கண்டு இறுதிப்போட்டியில் விளையாட முடியாமல் தமது நாடு திரும்புகிறார்கள். சிறீலங்கா வெல்ல வேண்டும் என்று விளையாடி அதிலே வெற்றி பெற்று இறுதிப்போட்டிக்கு செல்கிறார்கள். அங்கே பாகிஸ்தானுடன் மோத உள்ளார்கள்.

மேற்கிந்தியரின் பொறுப்பற்ற ஆட்டம் எரிச்சலையே எவனுக்கும் தரும். கிறிஸ் கைல் அரைச்சதம் பெற்றார். அடுத்த கூடிய ஓட்டம் பெற்றவர் 'திருவாளர்' உதிரி. மிகுதி 10 பேரும் ஒற்றை இலக்கத்துடனேயே ஆட்டம் இழந்தனர். போவதும் வருவதுமாக இருந்தார்கள். மேற்கிந்தியர்களுக்கு அதிர்ஷ்டம் வேறு போட்டு வாங்கியது. முதலாவது ஓவரிலேயே எல்லாம் முடிந்தது போல ஆகிவிட்டது. அஞ்சலோ மத்தியூஸ் அதிசயம் நிகழ்த்தினார். (ஏன் நிகழ்த்தினால் என்ன? யுவ்ராஜ் சிங் மாத்திரம் 2 ஹட்ரிக் எடுக்கலாம், ரோஹித் சர்மா ஹட்ரிக் எடுக்கலாம், இவர் நிகழ்த்த முடியாதா என யாரும் கேட்க வேண்டாம்) அதிசயம் தானய்யா இது! முதல் ஓவரிலேயே மூன்று விக்கட். மூன்றும் நேரடியாக விக்கட். அதுவும் துடுப்பில் பட்டு. ஒன்று தொடை காப்பிலே பட்டது. இப்படித்தான் முதல் ஓவர் 1 w 0 w 0 w. வேணாம் விளையாட்டு என்றாகிவிட்டது. எனக்கு கிரிக்கட்டில் பிடிக்காத அவுட் இந்த துடுப்பில் பட்டு விக்கட்டில் படுவது ( 'இன்சைட் எட்ஜ்'. ). ஒரு போட்டி. ஒரு ஓவர். ஒரு மூன்று விக்கட். இப்பொழுதே இணையங்கள் தொடங்கிவிட்டன. Beware Angelo Mathews, The Fourth 'M' (நன்றி : கிரிக்கெட்வேர்ல்ட்) . முரளி, மலிங்கா, மெண்டிஸ், மத்தியூஸ். ம்ம்ம்ம்ம். பார்ப்போம்.

நாலாவது 'M'

பின்னர் வந்து ஆடியவர்களோ உங்களை வெல்லப்பண்ணுவதே எமது நோக்கம் என்பது போல விக்கட்டுக்களை தாரை வார்த்து கொடுத்தனர். சிரிப்பதா அழுவதா என்று இருந்த ஆட்டம் ஜெரோம் ரெய்லர் உடையது. மனிதர் அண்மையில் நியூசிலாந்திற்கு எதிராக சதம் அடித்தவர் நியூசிலாந்தில் வைத்து. நான் அவரை நம்பி இருந்தேன் ஒரு ஓட்டமாக பெற்று கிறிஸ் கைல் இற்கு துடுப்பாட வாய்ப்பு கொடுப்பார் என்று. அவரோ தன்னை நம்பியே மேற்கிந்தியா இருக்கு என வானத்துக்கு பட்டம் விடுகிறார். அதுவும் முரளியின் பந்துக்கு. முரளிக்கு எவ்வளவு மரியாதை கொடுத்து கைல் ஆடினார் என்று போட்டியை பார்த்தவர்களுக்கு தெரியும். துடுப்பு பிடித்து பழக்கம் இல்லாத எமக்கு தெரிந்த பொது அறிவு கூட ரெய்லரிடம் இல்லை என்பதை நினைக்க வேதனையாக இருந்தது.

நான் மட்டும் போதுமா...?

மேற்கிந்தியரிடம் பிடித்ததும் பிடிக்காததும் ஒன்றே ஒன்று. விளையாட்டை விளையாட்டாய் விளையாடுவது. கொஞ்சம் கூட அக்கறை இல்லை. அடி அடி என்று அடித்து நொருக்குவார்கள். அடுத்த போட்டியிலேயே அவர்களா இவர்கள் என்று எண்ண வைப்பார்கள்.

இந்த தொடரில் பாகிஸ்தான் அணியின் தலைவர் யூனிஸ்கானின் தலைமைத்துவத்தை நான் நன்றாக ரசித்தேன். சங்கக்கார மீது மரியாதை வைத்திருந்தேன். ஆனால் அவர் சரியான பதட்டக்காரர் என்பதை அடிக்கடி நிரூபிக்கிறார். வெற்றி பெறும் நேரம் வந்த உடன் மட்டும் ஓடி வந்து பந்து வீச்சாளரிடம் அடிக்கடி உரையாடுகிறார். கிறிஸ் கைல் சலனமற்ற சடலம் போன்ற மனிதனாக மைதானத்துக்குள்ளே. இயல்பாகவே அந்த மனிதர் ஒரு சோம்பேறி போல இருப்பவர். அவருடைய துடுப்பாட்டமும் அப்படித்தான் இருக்கிறது என் எண்ணுகிறேன். காரணம் அடிப்பதில் 70% ற்கு மேல் ஆறும் நான்கும். ஓட அவருக்கு 'பஞ்சி' என கருதுகிறேன். கைல் தலைவர் என்ற அந்த பதவிக்கான துடிப்பான மனிதர் இல்லை என்பது என் கருத்து.

டில்ஷான் ஒரு புறம் பெரும் வியப்பான மனிதராகி விட்டார். வேறு யாராவது 'அப்படி' அடித்தால் 'அந்த' அடியை 'டில்ஷான் ஷொட்' எனும் அளவிற்கு பெயர் எடுத்துவிட்டார். முன்பும் இப்படித்தான் சிம்பாப்வே யின் டக்லஸ் மரிலியர் விளையாடினார். அவரும் இந்த 'ஷொட்' மூலம் ரொம்ப பிரபலமாகி இருந்தார். நேற்றைய போட்டியில் சனத் ஜயசூர்யா தட்டுத்தடுமாற (37 பந்தில் 24) டில்ஷான் பொழந்து கட்டினார். கடைசிப்பந்தில் 6 அடித்தால் சதம். ஆனால் 2 ஓட்டம் மட்டும் எடுத்து 57 பந்தில் 96 ஓட்டங்கள். ஆரம்பத்துடுப்பாட்ட வீரராக வந்து இறுதி வரை ஆட்டமிழக்காமல் இருந்தார். அதேபோன்றுதான் கிறிஸ் கைலும் ஆட்டமிழக்காமல் இருந்தார்.

மேற்கிந்தியரின் இரண்டு அற்புதமான பிடி தவிர களத்தடுப்பு மிக மிக மோசமாகவே இருந்தது. மேலதிக ஓட்டங்களை கொடுத்தமை, ரன்-அவுட் களை தவறவிட்டமை என்பவற்றுக்குமப்பால் துல்லியமற்ற பந்து வீச்சும் அவர்களுக்கு வினையாக அமைந்து விட்டது. நல்ல அணி. ஏனோ தோற்று விட்டார்கள். இறுதியில் கிறிஸ் கைல் இனை பேட்டி எடுக்கும் போது அழத் தொடங்கி விடுவாரோ என்று இருந்தது. தனியாக இருந்து இழுத்து வந்தார் அணியை. அவருக்கு எவரும் தோள் கொடுத்து ஆடவில்லை. இதே நிலைமைதான் டில்ஷானுக்கும். அவரும் தனியாகத்தான் கை கொடுத்தார். அதே நேரம் வெற்றியை தேடிக் கொடுத்து போட்டியின் நாயகனாகினார்.

இறுதிப்போட்டி ஒரு கண்ணோட்டம்

================================

இப்போது 'போஸ்' ற்காக நட்பு. பின்னர் போட்டிக்காக மோதல்

ஞாயிறு இறுதிப்போட்டி. பாகிஸ்தானா? இலங்கையா? இலங்கை இதுவரை தோற்கவில்லை. ஆனால் பாகிஸ்தான் அசத்தும் முன்னேற்றம். உமர் குல் பந்துகள் எல்லாம் மிரட்டுகின்றன. அவருக்கு ஏற்றாற் போல இங்கே மலிங்க. அங்கே பாகிஸ்தானில் அப்ரிடி, அஜ்மல். இங்கே முரளி, மெண்டிஸ். துடுப்பாட்டத்தில் பல வேறுபாடுகள். அப்ரிடியும் ஜயசூர்யாவும் அடித்தாடினால் எதிரணி நிலைமை மோசம். களத்தடுப்பு இரண்டு அணிகளும் நன்றாகவே செய்கின்றன. ஆனால் பொதுவாக பாகிஸ்தான் களத்தடுப்பில் சொதப்புவது வழமை. யூனிஸ்கானின் அனுபவமான தலைமைத்துவம் இங்கே இல்லை. ஆனால் இங்கே ஜயசூர்யா, மஹேல போன்றவர்களின் ஆலோசனை களத்திலே கிடைக்கும். பார்ப்போம் எப்படி இறுதிப்போட்டி என்று. மைதான ஆதரவு இலங்கைக்கு அதிகமாக இருக்கலாம். காரணம் இந்திய ரசிகர்கள் அதிகம் இலங்கைக்கு ஆதரவாக இருப்பார்கள். ஒன்று பாகிஸ்தான் அவர்களின் பரம வைரி. அடுத்தது இம்முறையும் இந்தியாவிற்கே கோப்பை என்ற எண்ணத்தில் அனுமதிச்சீட்டு வாங்கி வைத்திருப்பார்கள். அடுத்தது......வேணாம் விடுங்கள். போட்டியை பார்ப்போம்.

கிரிக்கெட்டில் ஒரு சாதனைப் போட்டி..!

கிரிக்கட் வரலாற்றில் ஓர் பொன்நாள். சாதனை ஏட்டின் சரித்திரநாள். அதுதான் 12.03.2006. ஆம் இந்தத் திகதியில் தான் அந்த ஒருநாள் சர்வதேசப் போட்டி நடைபெற்றது. தென்னாபிரிக்கா மற்றும் அவுஸ்ரேலியா அணிகள் மோதின. இது ஒருநாள் போட்டி வரலாற்றின் 2349வது போட்டி. ஏற்கனவே இந்தத் தொடரில் இரு அணிகளும் தலா 2 போட்டிகளில் வென்றதால் இந்த 5வது போட்டி மிகமிக முக்கியமானதாக இருந்தது. தென்னாபிரிக்காவின் ஜோகன்னஸ் பேர்க் நகரின் புதிய வொன்டரஸ் அரங்கத்தில் பயங்கர எதிர்பார்ப்பு இருந்தது. அனல் பறக்கும் போட்டியாக இது அமையும் என்பதால் 32000 ற்கும் அதிகமான ரசிகர்கள் அரங்கில் காத்திருக்கிறார்கள்.

அணிகளும் தயாராகின. நாணயச் சுழற்சியில் ஆஸ்திரேலியா அணித்தலைவர் ரிக்கி பொண்டிங் வென்று முதலில் துடுப்பெடுத்தாடத் தீர்மானித்தார். ஆஸ்திரேலிய அணியில் மாற்றம் இல்லை. 4வது போட்டியில் விளையாடிய அதே அணி. ஆனால் தென்னாபிரிக்காவுக்கு ஆரம்பமே சவால்தான். சகலதுறை ஆட்டக்காரர் பொல்லக் அணியில் இல்லை. அவரிற்குப் பதிலாக ஜோன் வன்டர் வாத் இணைக்கப்பட்டார். ஆஸ்திரேலியாவின் ஆரம்ப ஜோடி கில்கிறிஸ்ட், மற்றும் சைமன் கட்டிச் களம் புகுந்தனர்.

முதலாவது பந்து வீச்சினை வீச மக்காயா நிற்ரினி தயாரானார். முதலாவது ஓவரின் நான்காவது பந்தில் ஒரு நான்கு ஓட்டத்தினை கில்கிறிஸ்ட் பெற்று கணக்கினை ஆரம்பித்தார். என்ரினியுடன் அன்ரூ ஹோல் இணைந்து பந்து வீசினார். இருவரும் ஆஸ்திரேலியருக்கு அச்சுறுத்தல் கொடுக்கவில்லை. பொல்லக் இல்லை என்ற துணிவில் ஆரம்ப ஜோடி அனாசயமாக அடித்தாடியது. ஓர் அட்டகாசமான ஆரம்பம். ஆரம்பமே அனல் பறந்தது. கில்கிறிஸ்டின் துடுப்பில் இருந்து பந்துகள் சீறிக்கொண்டு எல்லைக் கோடுகளைத் தொட்டது. 12வது ஓவரில் கில்கிறிஸ்ட் 35 பந்துகளை எதிர்கொண்டு 8 பவுண்டரிகளுடன் அரைச் சதத்தைத் தொட்டார். 15 ஓவர் நிறைவில் இலக்கு நஷ்டமின்றி 96 ஓட்டங்கள். சிறந்த ஒரு அடித்தளம். ஆனால் அடுத்த ஓவரில் ரெலிமேக்கஸ் வீசிய பந்தினை கில் கிறிஸ்ட் அடிக்க அன்ருஹோல் ஒரு கையால் அற்புதமாக பிடியெடுக்க 1வது விக்கட் வீழ்ந்தது. அடுத்து கட்டிச் உடன் இணைந்தார் அணித்தலைவர் பொண்டிங்.

இரண்டாவது போட்டியில் ஆஸ்திரேலியா 93 ஓட்டங்களுக்குள் சுருண்டது, அவரின் மனதிற்குள் ரணமாக இருந்தது. இருந்தாலும் தனது கணக்கை ஆரம்பிக்க 7 பந்துகள் காத்திருந்தார். இதற்கிடையில் கட்டிச் தனது அரைச் சதத்தை 60வது பந்தில் 6 நான்குகள், ஒரு ஆறுடன் நிறைவு செய்தார். கட்டிச்சின் அரைச்சதத்தை பொண்டிங் ஒரு நான்குடன் கொண்டாடினார். அந்த நான்குடன் பொண்டிங் ஒரு தெம்பு பெற்றார். அதை 22வது ஓவரில் ரெலிமேக்கஸ் இன் பந்துக்களில் 3 நான்கு ஓட்டங்களைப் பெற்று நிரூபித்தார். பிறகென்ன ஆட்டம் சூடுபிடித்தது. மளமளவென்று ஓட்டங்கள் ஏறின. இதற்கு சான்றாக கலிஸின் ஒரு ஓவரில் பொண்டிங் 2 ஆறு ஓட்டங்களை அடுத்தடுத்து பெற்றார். இரண்டாவது ஆறுடன் தனது அரைச்சதத்தை அட்டகாசமாகக் கடந்தார். இதற்காக பொண்டிங் 43 பந்துகளை எதிர்கொண்டார். 6 நான்குகள், 2 ஆறுகள் அடக்கம். இந்தத் தெம்புடன் பொண்டிங்கின் துடுப்பு சுழன்றது. ஓட்டங்கள் இலகுவாகக் கிடைத்தன. அப்போது கட்டிச் 79 ஓட்டங்களுடன் என்ரினியின் பந்தில் ரெலிமேக்கஸிடம் பிடிகொடுத்து அவுட்டானார்.

திடீர் திருப்பம். யாரும் எதிர்பாராத வகையில் மைக்கல் ஹசி களமிறங்கினார். பொண்டிங்குடன் இணைந்தார். அப்போது ஆஸ்திரேலியா 216/2, பொண்டிங் 72. இதன் பிறகுதான் தென்னாபிரிக்காவிற்கு சோதனை தொடங்கியது. பந்து வீச்சாளர்களுக்கு மதிப்பு தராமல் இருவரும் ஓட்டங்களைக் குவித்தனர். பொண்டிங் தான் சந்தித்த 71வது பந்தில் 9 நான்கு, 5 ஆறு அடங்கலாகத் தனது 20வது சதத்தை எட்டினார். 40வது ஓவரில் ஆஸ்திரேலியா 300 என்ற பெரிய ஓட்ட எண்ணிக்கையைத் தொட்டது. இன்னமும் 8 விக்கட்டுக்கள் இறுதி 10 ஓவரில் எதுவும் நடக்கலாம். கிறீம் ஸ்மித்தின் முகத்தில் ஈயாடவில்லை. 41வது ஓவரில் ஹசியும் ஐம்பதைக் கடந்தார். 33 பந்துகளை எதிர்கொண்டு 7 நான்குகள் ஒரு ஆறு அடங்கலாக அரைச்சதம் இருந்தது. பின்பு என்ன? எல்லாப் பந்துகளும் எல்லைக் கோடுகளுக்கு சென்றது. பொண்டிங்கும் ஹசியும் இணைந்து தென்னாபிரிக்க வீரர்களை துவம்சம் செய்தனர். வான வேடிக்கை நடத்தினர்.எங்களையா 93 ஓட்டங்களுக்குள் அடக்கினீர்கள் என்று ஆர்ப்பரித்து எழுந்து கேட்பது போல் அடி இருந்தது. பந்துகள் நாலா திசையும் பறந்தன.

44வது ஓவரின் இறுதிப்பந்தில் பொண்டிங்கின் அடித்த ஆறுடன் ஆஸ்திரேலியா 350 ஐக் கடந்தது. அடுத்த பந்தில் என்னாலும் இயலும் என்று ஹசியும் தன்பங்கிற்கு ஒரு ஆறு ஓட்டத்தை அரங்குக்குள் அடித்து பெற்றார். ஒவ்வொரு ஓவரிலும் ஆறுகள், நான்குகளுக்கு பஞ்சம் இல்லை. பந்துகள் பஞ்சாய் பறந்தன. அணி 374 ஓட்டங்களை பெற்ற போது ஹோலின் பந்தில் என்ரினியிடம் பிடிகொடுத்து ஹசி ஆட்டமிழந்தார். ஹசி 51 பந்தில் 81 ஓட்டங்களை பெற்றார். இவர் பொண்டிங்குடன் இணைந்து 97 பந்தில் 154 ஓட்டங்களை இணைப்பாட்டத்தின் மூலம் தமக்குள் பகிர்ந்து கொண்டார். அவர் ஆட்டமிழந்தால் என்ன நான் இருக்கிறேன் என்பது போல ஹோலின் பந்தில் ஒரு ஆறை அடித்து தனது 150 ஓட்டங்களைக் கடந்தார் பொண்டிங். அடுத்து சைமன்ட்ஸ் வந்து பொண்டிங்குடன் இணைந்தார்.

48 வது ஓவரில் நிறையவே நடந்தது. வீசியவர் ரெலிமேக்கஸ். இந்த ஓவரில் சைமன்ட்ஸ் அடித்த ஒரு ஆறு இலங்கை அணிக்கு ஆப்பாக இருந்தது. ஆம் அஸ்திரேலியா, இலங்கை அணியின் 398 என்ற ஓட்டத்தை கடந்து 400 ஐ எட்டியது. உலக கிரிக்கட் வரலாற்றில் 400 ஓட்டங்கள். நினைக்கவே தலைசுற்றும். இதே ஓவரில் அணியின் எண்ணிக்கை 407 ஆக இருந்த போது பொண்டிங் அவுட்டானார். அவர் அணித்தலைவர் என்கிற ரீதியில் பொறுப்பாகவும், அதிரடியாகவும் ஆடி 105 பந்தில் 13 நான்குகள் 9 ஆறுகள் அடங்கப்பெற்ற அட்டகாசமான 164 ஓட்டங்களைப் பெற்றார். அடித்தாடவேண்டிய நேரம், எனவே பிரட்லீ களமிறங்கினார். ஓவர் நிறைவுக்கு வர, இந்த ஓவரில் ரெலமேக்கஸ் 28 ஓட்டங்களை அள்ளி வழங்கினார். 50 ஓவர் நிறைவில் ஆஸ்திரேலியா ஒரு இமாலய இலக்கான 434 ஓட்டங்களை 4 விக்கட்டுக்களை இழந்து பெற்றது. இதற்குள் 43 நான்குகள் மற்றும் 14 ஆறுகள் அடங்கும்.

ஆஸ்திரேலியா அணி வீரர்களின் ஓய்வு அறையில் வீரர்கள் மிகவும் குதூகலமாக இருந்தார்கள். தாம் ஒரு உலக சாதனையை நிகழ்த்திய பெருமிதம் இருந்தது. பொதுவாகவே ஆஸ்திரேலியர்களுக்கு இருக்கும் ஏளனப்பார்வைகள் அன்றைக்கு சற்று அதிகமாகவே இருந்தது. ரசிகர்கள் போல் தாமும் வாய்க்குள் விரல் வைத்து விசில் அடித்து சாதனையை கொண்டாடினர். முன்னதாக புகழ்பெற்ற வர்ணனையாளர் ரொனிகிரேய்க் 31வது ஓவர் நடந்து கொண்டு இருந்த போது ஆஸ்திரேலியர்களின் ஆட்டத்தை நன்கு கணித்து இலகுவாக 400 ஓட்டங்களைப் பெறுவார்கள் என்று ஆரூடம் சொன்னதை ஆஸதிரேலியர்கள் நிரூபித்தனர். ஆஸ்திரேலியர்கள் மீண்டும் தாங்கள்தான ஒருநாள் ஜாம்பவான்கள் என்பதை வொன்டரர்ஸ் அரங்கில் காட்டினர். ஆஸதிரேலியர்கள் ஆட்டம் ரசிகர்களுக்கு பெருவிருந்தாக அமைந்தது. தென்னாபிரிக்க ரசிகர்களுக்கு ஆத்திரமாகவும் அவமானமாகவும் இருந்தது. இந்த சாதனையை தமக்கு எதிராக பெற்றுவிட்டார்களே என்று. இருந்தாலும் என்னதான் நடக்கும் என்று பொறுமையுடன் காத்திருந்தனர் ரசிகர்கள்.

இனி ஆஸ்திரேலியா களத்தடுப்பு. தென்னாபிரிக்கா துடுப்பாட்டம். ரசிகர்கள் நெஞ்சில் கலக்கம். இந்த ஓட்ட எண்ணிக்கையை இவர்களால் எட்ட முடியுமா? அதுவும் ஆஸ்திரேலியாவிற்கு எதிராக.... பொதுவாக வெற்றி இலக்கு 300 ஐ கடந்தாலே ஒரு உளவியல் அழுத்தம் வந்துவிடும். இந்த அழுத்தத்திற்குள் எதை சாதிக்க போகிறார்கள்... களமிறங்கிய ஆஸதிரேலிய அணிவீரர்களின் முகத்தில் ஒரே மகிழ்ச்சி. அனைவரும் சிரித்த முகத்துடன் இருந்தனர். இது வேறு தென்னாபிரிக்கர்களை வெறுப்பேற்றியது.

வழமை போல ஸ்மித்தும் டிப்பெனரும் துடுப்புடன் களமிறங்கினர். ஆஸ்திரேலியாவின் வேகப்புயல் பிரட்லீ பந்தை கையில் எடுத்தார். முதற் பந்தே ஒரு அகலப்பந்து. தென்னாபிரிக்காவின் கணக்கு தொடங்கியது. இரண்டாவது ஒவரில் பிராக்கன் வீசிய பந்தில் துடுப்பில் பட்ட பந்து நேரடியாகவே விக்கட்டில் பட டிப்பெனர் அவுட். ஆரம்பமே அதிர்ச்சி. ஆஸ்திரேலியர்கள் ஆரவாரித்தனர்.களமிறங்கினார் ஹேர்சல் கிப்ஸ். ரசிகர்கள் பயந்தனர், 2வது போட்டியில் தாம் ஆஸ்திரேலியர்களை சுருட்டியதற்கு இன்று அவர்கள் தம்மை சுருட்டப்போகிறார்களோ என்று. ஆனால் கிப்ஸும் ஸ்மித்தும் எல்லோர் எண்ணங்களையும் மாற்றத் தயாராகினர். மெதுவாக அடி எடுத்து வைத்து தொடங்கினர்.பந்துகள் எல்லைக்கோடுகளை எளிதாக கடந்தன. ஓட்டங்கள் குவிந்தன. 8வது ஓவரின் முதற்பந்தில் கிப்ஸ் பெற்ற நான்கு ஓட்டத்துடன் தென்னாபிரிக்கா 50 ஐ கடந்தது. அந்த ஓவர் நிறைவில் 57/1.

அடுத்து வந்த ஓவர்கள் அதிரடியாக அமைந்தன. தென்னாபிரிக்கா நிதானமாக முன்னேறியது. நான்குகள்தான் அதிகமாக நாலாபுறமும் பறந்தன. ஒரு பறம் ஸமித். மறுபுறம் கிப்ஸ். இருவரும் அடுத்தடுத்த ஓவர்களில் அரைச்சதத்தை பெற்றனர். முதலில் கிப்ஸ் 46 பந்தில் 6 நான்குகள் ஒரு ஆறுடன் பெற்றார். ஸமித் 36 பந்தில் 10 நான்குகளுடன் சிறப்பாக அரைச்சதத்தை பூர்த்தி செய்தார். இப்போது தென்னாபிரிக்கா 15 ஓவர்கள் நிறைவில் 120 ஓட்டங்கள். மிகச்சிறந்த ஓட்ட விகிதம். பொண்டிங் சிறிது கலங்கினார். ஆனால் அவர் நினைத்தது இந்த ஆட்டத்தை அடக்கலாம் என்று. முடியவில்லை. கிப்ஸும் ஸ்மித்தும் எங்களுக்கா அடித்து காட்டினீர்கள், எமக்கும் தெரியும் வித்தை என்பது போல் கொளுத்தித் தள்ளினர். ஹசி மற்றும் பொண்டிங் ஜோடி எப்படி தென்னாபிரிக்காவிற்கு நெருக்கடி கொடுத்ததோ அதே போன்று கிப்ஸ் மற்றும் ஸ்மித் ஜோடி ஆஸ்திரேலியாவிற்கு ஆக்கினையாக இருந்தது.தென்னாபிரிக்காவில் போட்டி என்பதால் தென்னாபிரிக்க ரசிகர்களே அதிகம். ஒவ்வொரு நான்கு மற்றும் ஆறு ஓட்டங்களுக்கும் அரங்கம் ஒரு தடவை அதிரும். இருவரும் மதம் கொண்ட யானை போல் மூர்க்கமாக ஆஸ்திரேலியர்களைத் தாக்கினர். எப்போதும் ஓட்ட விகிதத்தை 8 ற்கு மேலேயே வைத்திருந்தனர். ஸ்மித்தின் ஆட்டம் அட்டகாசமாக இருந்தது. சைமன்ட்ஸ் மற்றும் கிளார்க்கின் பந்துகளில் அவர் பெற்ற இரண்டு ஆறுகள் அவரின் ஆட்டத்திற்கு சிகரமாக அமைந்தது.

இருவரும் இணைந்து 128 பந்துகளில் 187 ஓட்டங்களை மணியாக சேகரித்த போது 23வது ஓவரில் ஸ்மித் கிளார்க வீசிய முதற்பந்தை ஆறாக மாற்ற முனைந்தார். உயர்ந்து சென்றதை எல்லைக்கோட்டிற்கு மிகமிகமிக அருகே வைத்து ஹசி அதனை அழகாக பிடி எடுத்தார். ஆக வெறும் 55 பந்தில் 13 நான்குகள் 2 ஆறுகள் அடங்கலாக 90 ஓட்டங்களுடன் ஸ்மித் அவுட்டானார். தென்னாபிரிக்க 190/2. ஸ்மித் அவுட்டான அடுத்த பந்தில் கிப்ஸ், ஸமித்தை எடுத்து விட்டீர்கள் , உங்களுக்கு தலையிடியாக நான் இருப்பேன் என்பது போல அரங்குக்குள் அடித்து அட்டகாசமான ஆறு ஓட்டத்தை பெற்றார். அந்த ஓவரின் இறுதியிலேயே தென்னாபிரிக்கா 200 ஐ கடந்தது. 23 ஓவர் நிறைவில் 200/2.

24வது ஓவரில் கிப்ஸ் அடுத்தடுத்து 2 பவுண்டரிகள் அடித்து தனது 16வது சதத்தை பூர்த்தி செய்தார். இதற்காக அவர் 79 பந்துகளை எதிர் கொண்டார். 11 நான்குகள், 3 ஆறுகளை அடித்தார். கிப்ஸ் சதத்தை கடந்ததும் ஆட்டத்தில் அனல் பறந்தது. ஆஸ்திரேலியர்களை 'சுனாமி' போல தாக்கினார். ஓட்ட விகிதத்தை 9 ற்கு உயர்த்தினார். அதிரடியான அட்டகாசமான துடுப்பாட்டம். கண்களுக்கு பெரு விருந்தாக அமைந்தது. இதற்கிடையில் கிப்ஸ் 130 ஓட்டங்களை பெற்ற போது லூயிஸின் பந்தை ஓங்கி அடித்தார். களத்தடுப்பில் பிராக்கன் அதனை பிடி எடுக்க முயல, கையை பறித்துக் கொண்டு பந்து தரையை தொட்டது. கிப்ஸ் தப்பிப்பிழைத்தார்.

முன்பும் இப்படித்தான் 99ம் ஆண்டு உலகக் கோப்பைப் போட்டியில் ஸ்டீவ் வோவின் பிடியை கிப்ஸ் தவற விட உலகக்கோப்பை ஆஸ்திரேலியர்கள் வசமானது. இப்போது பிராக்கன். உண்மையில் ஆஸதிரேலியர்கள் அசந்துதான் போனார்கள். பந்தை எங்கு விழுத்தினாலும் கிப்ஸ் அதை எல்லைக் கோட்டிற்கு அனுப்பத் தவறுவதில்லை.

29வது ஓவரில் கிப்ஸ் லூயிசை உதைத்தார். ஆறு பந்துகளையும் தானே எதிர் கொண்டு அதில் 3 நான்குகள் ஒரு ஆறைப்பெற்றார். அந்த ஆறுடன் கிப்ஸ் 150 ஐ தொட்டார். அந்த 29 வது ஓவர் நிறைவில் தென்னாபிரிக்கா 271/2.

31வது ஓவரில் பிராக்கன் வீசிய பந்தை கிளார்க்கிடம் பிடி கொடுத்து டிவில்லியர்ஸ் ஆட்டமிழந்தார். அந்த ஓவர் நிறைவில் தென்னாபிரிக்கா 284/3. அடுத்த ஓவர் சைமன்ட்ஸ் இனுடையது. கிப்ஸ் அடுத்தடுத்து 2 ஆற ஓட்டங்களைப்பெற்றார். அதற்கடுத்த பந்தில் பிரடலீயிடம் பிடி கொடுத்து கிப்ஸ் ஆட்டமிழந்தார். அப்போது கிப்ஸ் 111 பந்துகளில் 21 நான்குகள், 7 ஆறுகள் அடங்கலான அற்புதமான 175 ஓட்டங்களை குவித்திருந்தார். இது அவருடைய சொந்த அதிக பட்ச ஓட்டமாகும். உண்மையில் கிப்ஸின் ஆட்டம் மிக அற்புதமான ஆட்டம். அவர் ஆஸ்திரேலியர்களுக்கு நிறையவே நெருக்கடிகள் கொடுத்தார். அவரின் ஆட்டமிழப்பு ஆஸ்திரேலியர்களை நம்பிக்கையுற வைத்தது.

இப்போது இரண்டு பதிய வீரர்கள் களத்தில். கலிஸ் மற்றும் பவுச்சர். 32 ஓவர் நிறைவில் தென்னாபிரிக்கா 284/4. இருவரும் ஆஸ்திரேலியர்களுக்கு அச்சுறுத்தலாக இருக்கவில்லை. மாறாக இருவரின் ஆட்டமும் தென்னாபிரிக்காவை நெருக்கடிக்குள் தள்ளியது என்றுதான் சொல்ல வேண்டும். ஆஸ்திரேலியர்கள் போட்டியை ஓரளவிற்கு தமது கட்டுப்பாட்டிற்குள் வைத்திருந்தனர். 38வது ஓவரில் கலிஸ் சைமன்ட்ஸின் பந்தில் அவரிடமே பிடி கொடுத்து 20 ஓட்டங்களுடன் ஆட்டமிழந்தார். அப்போது 38 ஓவர் நிறைவில் தென்னாபிரிக்கா 330/5. கடைசி ஆறு ஓவர்களில் 31 ஓட்டங்களைத்தான் பெற்றனர். இது வெற்றி பெறுவதற்கு தேவையான ஓட்ட விகிதத்தை அதிகரித்தது. பவுச்சருடன் ஜஸ்ரின் கெம்ப் இணைந்து கொண்டார். இவரும் பெரிதாக சாதிக்கவில்லை. ஒரு ஓவரிற்கு 10 எடுத்தால்தான் வெற்றி என்ற நிலையில் கெம்ப் ஆட்டமிழந்தார். நிறையவே எதிர்பார்க்கப்பட்டவர். சோபிக்கத் தவறினார். 43 ஓவர் நிறைவில் தென்னாபிரிக்கா 358/6.

இப்போது வெற்றிபெறத் தேவையான ஓட்டவிகிதம் சரியாக 11. அதாவது 7 ஓவர்களில் 77 ஓட்டங்கள் தேவை. கையில் இருப்பது 4 விக்கட்டுகள். கதிரையின் விளிம்பில் ரசிகர்கள். ஆஸ்திரேலியர்களுக்கு நம்பிக்கை துளிர் விட்டது. பவுச்சர் தான தலையிடி கொடுப்பார். இன்னமும் 4 விக்கட்டுக்கள். மறுபுறத்தால் கழட்டினால் வெற்றி நமதே. இது பொண்டிங்கின் நினைப்பு. பவுச்சருடன் இணைந்த வனடர் வாத், பொண்டிங்கின் நினைப்பில் மண் அள்ளிப்போட்டார். ஆறுகள், நான்குகள் பறந்தன. இரண்டு ஓவர்களில் 3 ஆறுகள், 1 நான்கு பெற்றார். வன்டர்வாத்தின் துடுப்பாட்டம் போட்டியை ஆஸ்திரேலியர்களிடம் இருந்து பறித்தது. 42 பந்தில் 72 ஓட்டஙகள் தேவை என்ற நிலையை இவரும் பவுச்சரும் சேர்ந்து அற்புதமாக ஆடி 24 பந்தில் 38 ஓட்டங்கள் என்ற நிலைக்கு மாற்றினர். 46 ஓவர் நிறைவில் தென்னாபிரிக்கா 397/6.

மீண்டும் பிராக்கனின் பந்தில் வன்டர் வாத் பவிலியன் திரும்பினார். இவர் 18 பந்தில் 3 ஆறுகள், ஒரு நான்கு உட்பட 35 ஓட்டங்கள் பெற்றார். மறுபுறத்தில் பவுச்சர் 31 ஓட்டங்களுடன் சுமையை தனது தோளில் போட்டு பொறுமையாக இருந்தார். இப்போது போட்டி மீண்டும் ஆஸ்திரேலியாவின் கையில். தென்னாபிரிக்கா 399/7. உள்ளே நுழைந்தார் ரெலிமேக்கஸ். 3 வது போட்டியில் அட்டகாசமாக ஆறுகள் அடித்தார். ஆகவே இப்போது எதிர்பார்ப்பு அவரிடம். அவரும் அதற்கேற்றால் போல் ஒரு நான்கைப் பெற்றார். இப்போது தென்னாபிரிக்காவும் 400 ஐ எட்டியது.

இரண்டாவது தடவையாக ஒருநாள் போட்டிகளில் 400 ஓட்டம். அதுவும் ஒரே போட்டியில். பரபரப்பான போட்டி விறுவிறுப்பின் விளிம்பில் ரசிகர்கள். எதுவும் நடக்கலாம. ரெலிமேக்கஸும் பவுச்சரும் நான்குகளாக அடித்து வெற்றியை நெருங்கினர். 48வது ஓவரில் பவுச்சர் இரண்டு நான்குகள், ரெலிமேக்கஸ் ஒரு நான்கு. இந்த ஓவரில் தான் ஒரு தவிர்க்க முடியாத சாதனை. அவுஸ்திரேலியாவின் மிக்லூயிஸ் என்ற பந்து வீச்சாளர் அள்ளி அள்ளி ஓட்டங்களை வழங்கியோரின் சாதனையில் முதலாவதாக திகழ்ந்தார். இலங்கை அணியின் முரளீதரனின் 10 ஓவரில் 99 ஓட்டங்கள் கொடுத்த சாதனையை கடந்து 113 ஓட்டங்களை வாரி வழங்கினார். முன்பு 1983ம் ஆண்டு மார்க் ஸ்னெடீன் என்ற நியூசிலாந்து வீரர் 12 ஓவரில் 105 ஓட்டங்களைக் கொடுத்தார். இப்போது எல்லோரையும் முந்தி லூயிஸ் பெரும் வள்ளல் ஆனார்.

48 ஓவர் முடிவில் 422/7. 12 பந்தில் 13 ஓட்டங்கள். இப்போது வெற்றியின் விளிம்பில் தென்னாபிரிக்கா. 49வது ஓவரை பிராக்கன் வீச இரண்டாவது பந்தில் ரெலிமேக்கஸ் அவுட். மீண்டும் போட்டி அவுஸ்திரேலியாவிடம். உள்ளே நுழைந்தார் அன்ரூஹோல். பவுச்சர் நிதானமாக மறுபுறத்தில் ஆடிக்கொண்டிருந்தார். இந்த ஓவரும் நிறைவுக்குவர தென்னாபிரிக்கா 428/8.

இறுதி ஓவர். தேவை 7 ஓட்டங்கள். ஒருநாள் போட்டியில் எதுவும் நடக்கலாம் ஆனால் தென்னாபிரிக்கா இப்போது தோற்றால் மீண்டும் ஒருதடவை பரிதாபத் தோல்வி. ரசிகர்களுக்கும், அணி வீரர்களுக்கும் திருப்தியான விடயம், பந்து வீச்சை எதிர் கொள்பவர் பவுச்சர். பந்து பிரட்லீயின் கையில். முதற்பந்தை பவுச்சர் ஓங்கி அடிக்க லீ தனது காலாலேயே தடுக்க ஒரு ஓட்டம் மட்டும் தான். இப்போது ஹோலின் முறை. 5 பந்தில் 6 ஓட்டங்கள். என்ன ஒரு போட்டி அரங்கம் கடும் பரபரப்புக்கு மத்தியில் உற்சாகப் படுத்தியது. லீயின் இரண்டாவது பந்தில் ஹோல் ஓங்கி அடித்து 4 ஓட்டம் பெற்றார். ரசிகர்கள் துள்ளிக் குதித்தனர். அணி வீரர்கள் தமது ஓய்வறையில் ஆரவாரித்தனர். இலகுவாக வெற்றி கிடைக்கப் போகிறது. 4 பந்தில் இரண்டு ஓட்டங்கள். லீயின் அடுத்த பந்தில் ஹோல் ஓங்கி அடிக்க கிளார்க் அதனை பிடி எடுக்க ஹோலும் ஆட்டமிழந்தார். தென்னாபிரிக்கா 433/9. அற்புதமான போட்டி. இப்போது போட்டி அவுஸ்திரேலியாவிடம். காரணம் துடுப்பாடவிருப்பவர் மக்காயா நிற்ரினி. எல்லோரும் எதிர்பார்த்தது தென்னாபிரிக்கா தோல்வி. இந்தப்பந்து லீயின் கதாயுதமான யோக்கர் பந்தாக இருக்கும். அதில் நிற்ரினி அவுட. ஆனால் எல்லோரும் எதிர்பார்த்தது போல் லீ அப்படி பந்து வீசவுமில்லை. நிற்ரினி அவுட்டாகவுமில்லை. மாறாக ஒரு ஓட்டம் பெற்றார். இப்போது ஓட்ட எண்ணிக்கை சமம் 434/9. நிற்ரினி களமிறங்கும் போது தென்னாபிரிக்கா அணி வீரர்கள் முகத்தில் இறுக்கம். இப்போது துள்ளிக் குதித்து ஆரவாரித்தனர். வெற்றி இல்லை என்றாலும் சமம் என்ற கௌரவம். ஆனால் அடுத்த பந்தில் சரித்திரம் எழுதினார் பவுச்சார். ஓங்கி அடிக்கப்பட்ட பந்து எல்லைக் கோட்டை கடக்க தென்னாபிரிக்கா 438/9.
ஒரு பந்தும் ஒரு விக்கட்டும் மீதம் இருக்க மகத்தான வெற்றி. தென்னாபிரிக்கா வரலாறு படைத்தது. அந்த நான்குடன் பவுச்சரும் 50 ஓட்டத்தை பெற்றார். பவுச்சரின் பொறுப்பான ஆட்டம் வெற்றியைத் தேடித்தந்தது.

ஒருநாள் போட்டிகளில் மிகச்சிறந்த போட்டியாக இது அமையும். இப்படிப்பட்ட போட்டியை இதற்கு முன் கண்டதுமில்லை. கேட்டதுமில்லை. வர்ணனையாளர் ரொனி கிரேய்க் 400 ஐ தென்னாபிரிக்கா எட்டிய போது சொன்னார். "இங்கு என்ன நடக்கிறது என்று என்னால் நம்ப முடியவில்லை" என்று. உண்மைதான். உன்னதமான போட்டி. அற்புதமான வெற்றி. அவுஸ்திரேலியா தான் அதிகூடிய ஓட்டம் என்று வைத்திருந்த 434 ஐ நான்கு மணித்தியாலத்தில் தென்னாபிரிக்கா முறியடித்தது. அவுஸ்திரேலியாவிற்கு ஒரு பலத்த அடி. 375 பிறகு தென்னாபிரிக்கா பெற்ற ஒவ்வொரு ஓட்டத்திற்கும் ரசிகர்கள் எழுந்து நின்று மரியாதை செலுத்தி ஆரவாரித்தனர்.

பவுச்சர் ஓங்கி அடித்ததும், ஓய்வறையில் நின்ற வீரர்கள் மைதானத்திற்குள் பாய்ந்து சென்று கட்டித்தழுவி வெற்றியைக் கொண்டாடினர். 400 ஓட்டங்கள் அடிப்பது சிரமம. உலகின் முன்னனி அணியான அவுஸ்திரேலியா அணி அதனை அடித்து தன்னை நிரூபித்தது. அதே போட்டியில், அதே அவுஸ்திரேலியாவிற்கு நீங்கள் அடிக்கும் போது எங்களுக்கு எப்படி இருந்தது என்று தாமும் 400 ஐ அடித்து வெற்றி பெற்றனர். சரித்திர வெற்றி.நிச்சயமாக ஆட்ட நாயகன் கிப்ஸ். ஆனால் மத்தியஸ்தர் ரிக்கி பொண்டிங், மற்றும் கிப்ஸ் இருவருக்கும் வழங்கினார்.

இதில் இரு அணிகளும் சேர்ந்து மொத்தம் 872 ஓட்டங்களை 13 விக்கட்டுகளை இழந்து பெற்றனர். தென்னாபிரிக்கா மொத்தம் 44 பவுண்டரிகள், 12 ஆறுகள் பெற்றனர். மொத்தமாக இந்தப் போட்டியில் 87 நான்குகளும், 26 ஆறுகளும் குவிக்கப்பட்டன. தென்னாபிரிக்கா அணி ஆகக் கூடிய மொத்த ஓட்ட எண்ணியையும், இரண்டாவதாக துடுப்பெடுத்தாடி அதிகூடிய ஓட்டம் என்ற சாதனையையும் தனதாக்கியது.

இது சாதனைகளின் சிகரமாக அமைந்த போட்டி. மொத்தத்தில் ரசிகர்களுக்கு பெருவிருந்தாக அமைந்தது.

இந்த பதிவு 2006 ல் இலங்கை யாழ்ப்பாணத்தில் வெளிவந்த "வேடிக்கை" திங்கள் இதழில் வெளிவந்தது. இது நீண்ட பதிவுதான். ஆனால் தவிர்க்க முடியவில்லை. இதனை தட்டச்சு செய்து உதவிய நண்பன் தீபனுக்கு நன்றிகள்.

ஆடிப்போனது ஆஸ்திரேலியா...!

ஆஸ்திரேலியாதான் உலகின் முதல்தர அணி என்ற மகுடம் மெதுவாக சரிந்து கொண்டிருக்கிறது. இப்போது தென்னாபிரிக்காவின் கை ஓங்கியே வருகிறது.

தென்னாபிரிக்காவிற்கு இமாலய தொடர் வெற்றி. மெல்பேர்ன் மைதானத்தில் இன்றைய வெற்றி ஆஸ்திரேலியாவிற்கு பேரிடியாக மாறி உள்ளது. பெரும் தலைகள் உருளும் அபாயம் தோன்றியுள்ளது. குறிப்பாக மத்யூ ஹைடன். இவரின் கடைசி 15 இன்னிங்ஸ்சில் வெறும் 313 ஓட்டங்களே பெற்றார். இது ஆஸ்திரேலிய அணியில் எதிர்பார்க்க முடியாத பெறுதி. இப்பொழுதே விமரிசனங்கள் பலவாறாக எழத்தொடங்கிவிட்டன. இப்போது ஹைடன் தலைவிதி தேர்வாளர்களின் கைகளில். வயதும் 37ஐத் தாண்டி விட்டது. பார்ப்போம்.

ஆஸ்திரேலியா முதல் இன்னிங்ஸ்சில் சற்று பலமாக இருப்பதாகவே பட்டது. பொண்டிங் பெற்ற வேகமான சதம் (101), கிளார்க்(88) மற்றும் கட்டிச்(54) பெற்ற அரைச்சதங்கள் 394 என்ற ஓட்டங்கள் பெற உதவின. டேல் ஸ்ரைன் தன் பங்கிற்கு 5 விக்கட்டுக்களை சாய்த்தார். தென்னாபிரிக்க துடுப்பாட்டத்தில் சொதப்பியது. கிறீம் ஸ்மித் பெற்ற 62 ஓட்டங்கள் தவிர மற்றவர்கள் சோபிக்கத்தவறினர். 184-7 என்ற ஒரு மோசமான நிலையில் இருந்தனர். களத்தில் இருந்த போல் டும்னி பின்னால் வந்த வீரர்களை தன்னோடு சேர்த்து அனாசயமாக விளையாடினார். ஆஸ்திரேலியா பந்து வீச்சுகளை துவம்சம் செய்து மெதுவாக முன்னேறினர்.


யாருமே எதிர்பார்க்க முடியாத இணைப்பாட்டம் ஒன்றினை டும்னியும் டேல் ஸ்ரைனும் ஏற்படுத்தி ஆஸ்திரேலியாவிற்கு தலையிடி கொடுத்தனர். இருவரும் தம்மிடையே 180 ஓட்டங்களை பகிர்ந்தனர். டும்னி தன்னுடைய கன்னி சதத்தைப் பெற்றார். ஸ்ரைனும் தன்னுடைய கன்னி அரைச்சதத்தைப் பெற்றார். ஒரு ஆஸ்திரேலியர் CricInfo இணையத்தளத்தில் எழுதியிருந்தார். ஸ்ரைன் சதம் அடித்தால் தான் ஆஸ்திரேலியாவிற்கான தந்து குடியுரிமையை கைவிடப்போவதாக. அந்தளவு கடுப்பில் ஆஸ்திரேலியர் இருந்தனர். ஆனால் தூரதிஷ்டவசமாக ஸ்ரைன் சதம் பெறாமல் 76 ஓட்டங்களுடன் ஆட்டமிழக்க டும்னியும் 166 ஓட்டங்களுடன் ஆட்டமிழந்தார். தென்னாபிரிக்கா இப்போது 459 ஓட்டங்களுக்கு ஆட்டமிழந்தது.

பந்துவீச்சில் சிடில் 4, ஹோரிட்ஸ் 3. ஆஸ்திரேலியவின் இரண்டாவது இன்னிங்ஸ் முதலாவதை விட மோசமாக இருந்தது. விக்கட்டுகள் ஒரு சீரான இடைவெளிகளில் வீழ்ந்து கொண்டிருந்தது. ஆனாலும் முதல் இன்னிங்ஸ்சில் சதமடித்த பொண்டிங் இம்முறையும் பொறுப்பாக விளையாடினார். ஆனால் மனிதர் தன்னுடைய 38வது சதத்தை வெறும் ஒரு ஓட்டத்தால் தவறவிட்டார். இப்போ ஆஸ்திரேலியா 247 ஓட்டங்களுக்குள் ஆட்டமிழந்தது. வெற்றி இலக்கான 183 இனை தென்னாபிரிக்கா ஒரு விக்கட்டை மட்டும் இழந்து பெற்றனர். மகத்தான வெற்றி தென்னாபிரிக்காவிற்கு. அது மட்டுமல்ல தொடரையும் கைப்பற்றிவிட்டனர்.

• மைக்கல் ஹசி, மத்யூ ஹைடன் துடுப்பாட்ட பெறுதிகள் மிக மோசமாக உள்ளது. பந்து வீச்சில் பிரெட் லீ இடையில் காயப்பட்டு அதிக நேரம் பந்து வீசவில்லை.


• ஆஸ்திரேலியாவில் வைத்து தென்னாபிரிக்கா பெற்ற முதலாவது தொடர் வெற்றி இது.


• ஆஸ்திரேலியா தனது சொந்த மண்ணில் 1991-92 பருவகாலத்தில் மேற்கிந்தியரிடம் 2-1 என தோற்ற பின்னர் ஒருதொடரை இழப்பது இதுவே 17வருடத்தின் பின் முதல் தடவை.
  
• கடைசியாக விளையாடிய 10 தொடர்களில் தென்னாபிரிக்கா இன்னமும் ஒரு தொடரை தன்னும் தோற்கவில்லை.


• இந்த வருடத்தில் அதிக ஓட்டங்கள் பெற்றவர் வரிசையில் ஸ்மித் 15 போட்டிகளில் 1656 ஓட்டங்கள் பெற்று முன்னிலையில் உள்ளார். பந்து வீச்சில் டேல் ஸ்ரைன் 13 போட்டிகளில் 74 விக்கட்டுக்கள் பெற்றுள்ளார்.

ஆஸ்திரேலியர் காலம் அஸ்தமித்து கொண்டு வருகிறதா என எண்ணத் தோன்றுகிறது. தோல்வியில் இருந்து யாரும் தப்ப முடியாது என்ற அடிப்படையில் ஆஸ்திரேலியா அண்மைக்காலமாக தடுமாறியே வருகிறது.

தென்னாபிரிக்காவும் இந்தியாவும் பெரும் எழுச்சி கண்டுள்ளன. அடுத்த போட்டியில் தென்னாபிரிக்கா வென்றால் தொடரின் எல்லாப் போட்டிகளையும் வென்ற White Wash வெற்றி. இது ஆஸ்திரேலியாவின் முதலாம் ஸ்தானத்தை தகர்க்கலாம். அடுத்த போட்டி சிட்னி மைதானத்தில் புதுவருடத்தில் ஜனவரி 3. இந்த வருடம் ஆஸ்திரேலியர்களுக்கு பெரும் சோதனை வருடம். இந்தையாவிடம் தொடர் தோல்வி. இப்போ தென்னாபிரிக்காவிடாம். மீண்டும் ஆஸ்திரேலியா துளிர்க்குமா? அல்லது வாடிவிடுமா?

அசத்தியது தென்னாபிரிக்கா.................! அச(சை)ந்தது ஆஸ்திரேலியா.................!!

இது கிரிக்கட். இறுதிப்பந்து வரை எதையும் சொல்லமுடியாதாம். உண்மைதான். இன்று ஆஸ்திரேலியாவின் 'பேர்த்' இல் உள்ள 'வகா - (WACA- Western Australia Cricket Association)மைதானத்தில் தென்னாபிரிக்கா ஆஸ்திரேலியாவிற்கு எதிராக ஒரு அபார வெற்றியை பெற்றுள்ளது. இது ஆஸ்திரேலியர்களின் டெஸ்ட் நிலையை சற்று ஆட்டம் காண செய்துள்ளது. ஒருநாள் போட்டி, டெஸ்ட் போட்டி என் இரண்டிலும் அசத்தி வந்த ஆஸ்திரேலியா இப்போதெல்லாம் சரிவுகளை மட்டுமே சந்தித்து வருகிறது.

ஆஸ்திரேலியாவின் ஆரம்ப துடுப்பாட்ட முதுகெலும்பாகிய மத்யூ ஹைடன் அண்மைக்காலமாக சொதப்பியே வருகிறார். இது ஆஸ்திரேலியர்களுக்கு பெரிய தலையிடி. அவர் நல்ல நிலைக்கு (போர்ம்) திரும்பாதது கவலையே. அதேபோல மைக்கல் ஹசி யினதும் பொண்டிங்கினதும் பெறுபேறு இந்தப்போட்டியில் சோபிக்கவில்லை. இது அவர்களை துடுப்பாட்டத்தில் பெரிதும் சரிவை கொடுத்தது. ஹைடன் (12,4) , பொண்டிங் (0,32) , ஹசி (0,8). ஆனாலும் இரண்டு இன்னிங்ஸ்சிலும் பின்வரிசை வீரர்களின் பொறுப்பான(?) தடாலடி ஆட்டம் அவர்களைக் காப்பாற்றியது. குறிப்பாக விக்கட் காப்பாளர் பிராட் ஹடின் பெற்ற 46+94 மற்றும் ஜேசன் கிறேசா பெற்ற 30* + 32 என்பவை முக்கியமானது. பொதுவாக சொன்னால் ஆஸ்திரேலியர்கள் துடுப்பாட்டத்தில் பெரிதாக சாதிக்கவில்லை என்றே சொல்லலாம்.

முதல் இன்னிங்ஸ்சில் பந்துவீச்சில் மக்காயா என்ரினி 4விக்கட்டுக்களை சாய்த்தார். பெரிதும் எதிர்பார்க்கப்பட்ட டேல் ஸ்ரைன் 2 விக்கட்டுக்களை பெற்றார்.

தென்னாபிரிக்காவும் ஆஸ்திரேலியர்களுக்கு நாம சளைத்தவர்கள் அல்ல என முதல் இன்னிங்ஸ்சில் தடுமாறினர். ஆனால் அவர்கள் வலுவான நிலையில் இருந்தனர். அதாவது ஒரு நிலையில் 234-3. ஆனால் பின்னர் மிச்சல் ஜோன்சனின் வேகம் அவர்களை நிலைகுலைய வைத்தது. 281 ற்கே ஆட்டமிழந்துவிட்டனர். கலிஸ்-63, டிவில்லியேர்ஸ்-63, ஸ்மித்-48, அம்லா-47. ஜோன்சன் தனது சிறப்பு பெறுதியாக வெறும் 61 ஓட்டங்களை கொடுத்து 8 விக்கட்டுக்களை அள்ளி எடுத்தார். இப்போ ஆஸ்திரேலியா 94 ஓட்டங்கள் முன்னிலையில்.

இரண்டாவது இன்னிங்ஸ்சிலும் ஆஸ்திரேலியா துடுப்பாட்டத்தில் கோட்டை விட்டது. ஒரு கட்டத்தில் 162/7 என்ற மோசமான நிலையில் இருந்தனர். அப்பொழுது அவர்கள் 256 ஓட்டங்கள் மட்டும் முன்னிலையில் இருந்தனர். பின்னர் ஹடின் பின்வரிசை சகபாடிகளுடன் இணைந்து அசத்தி ஆஸ்திரேலியாவை 319 வரை உயர்த்தி வெற்றிக்கான இலக்கை 414 என நிர்ணயித்தார். பந்து வீச்சை பொறுத்தவரை எல்லோரும் தம்பங்கை சிறப்பாகவ்வே செய்தனர்.

வெற்றி இலக்கு 414. தென்னாபிரிக்கா ஒருவித நம்பிக்கையுடன் களமிறங்கியது. மக்கன்ஸி (2+10) மீண்டும் ஏமாற்ற, மீண்டும் ஸ்மித் மற்றும் அம்லா ஜோடி இணைந்து ஆஸ்திரேலியாவை மிரட்டியது. சிறப்பாக ஆடினர். பொண்டிங் ஜோகன்னர்ஸ்பேர்க் 438 ஓட்டங்களை வாழ்வில் மறக்கமாட்டார். அந்த உணர்வை மீண்டும் பெறத்தொடங்கினார் போலும். மனுஷன் களத்தில் விரல் நகங்களை கடித்து துப்பிய வண்ணமே இருந்தார் (போட்டிக்கு முன்னர் வளர்ப்பாரோ?). இந்த ஜோடி 153 ஓட்டங்களை பகிர்ந்தது. இருவரும் அடுத்தடுத்து ஆட்டமிழக்க தென்னாபிரிக்கா இப்போது 179-3. இப்போது கலிசும் டிவில்லியர்ஸ்சும் தலையிடி கொடுத்தனர். இந்த ஜோடியும் அபாரமாக ஆடி வெற்றியை நோக்கி பயணித்தது. 124 ஓட்டங்களை இணைப்பாக பெற்றதும் கலிஸ் ஆட்டமிழந்தார். அப்போது நிலை 303-4. பரபரப்பான சூழலில் தனது கன்னி போட்டியில் விளையாடும் போல் டும்னி டீவில்லியர்ஸ் உடன் இணைந்து அபாரமாக ஆடி வெற்றியை எட்டினர். டிவில்லியர்ஸ் அற்புதமான சதம் பெற்றார்(106*). இவ்வேளை டும்னியோ வெற்றிக்கான ஓட்டங்களை பெற்றதோடு தனது அரை சதத்தையும் எட்டினார்(50*). வெறும் 4 விக்கட்டுக்களை மட்டும் இழந்து அவர்கள் தமது வெற்றி இலக்கான 414 இனை எட்டினர். ஆஸ்திரேலியாவிற்கு மீண்டும் தென்னாபிரிக்கா அதிர்ச்சி வைத்தியம் பார்த்தனர். எதிர்பாராத ஆனால் அற்புதமான வெற்றி தென்னாபிரிக்காவிற்கு. இரண்டு இமாலய இலக்குகளை தென்னாபிரிக்கா ஆஸ்திரேலியாவிற்கு எதிராக பெற்று சாதனை படைத்துள்ளது. ஒன்று ஜோகன்னஸ்பேர்க்கில் பெற்ற 438. மற்றையது இன்று. ஆனால் முதலாவது ஒருநாள் போட்டியில். இரண்டாவது டெஸ்ட் போட்டியில்.

டிவில்லியர்ஸ்சின் அற்புதமான துடுப்பாட்டத்திற்கும் அவரது அபாரமான களத்தடுப்பிற்குமாக ஆட்டநாயகன் விருதை பெற்றார்.

* டெஸ்ட் வரலாற்றில் 4வது இன்னிங்ஸ்சில் துடுப்பெடுத்தாடி பெற்ற இரண்டாவது பெரிய வெற்றி. முதலாவது மேற்கிந்தியா ஆஸ்திரேலியாவிற்கு எதிராக 418 இனை சென்ற்.ஜோன்ஸ் அன்ரிகுவாவில் பெற்றது.

*ஸ்மித் இப்போது 4வது இன்னிங்ஸ்சில் துடுப்பெடுத்தாடி பெற்ற சாராசரி ஆனது கிரிக்கட் வரலாற்றில் மூன்றாவது நல்ல பெறுதி. முதலாவது ஜெவ்ரி போய்கொட், மற்றும் சுனில் கவாஸ்கர். ஆனால் ஸ்மித் 4வது இன்னிங்ஸ்சில் 3 சதம் பெற்றுள்ளார். இந்த 3 போட்டிகளிலும் தென்னாபிரிக்கா வென்றுள்ளது.

டெஸ்ட் போட்டிகளும் எப்போதும் விறுவிறுப்பானவை என அண்மைக்காலப் போட்டிகள் நிரூபித்துள்ளன. அதற்கு சிகரமாக இந்தப் போட்டி அமைந்துள்ளது. 3 போட்டிகள் கொண்ட தொடரில் தென்னாபிரிக்கா இப்போது 1-0 என்று முன்னிலை. ஆஸ்திரேலியா அசத்துமா? அல்லது அமிழ்ந்து போகுமா பொறுத்திருந்து பார்ப்போம். அடுத்தது 'பொக்சிங் டே' (டிசம்பர் 26) போட்டி மெல்பேர்னில் நடைபெறும்.

மீண்டும் ஒரு பதிவில் சந்திப்போம்......!

ராகுல் ட்ராவிட்: காலம் முடிகிறதா...?

1996ம் ஆண்டு லோர்ட்ஸ் மைதானத்தில் இங்கிலாந்திற்கு எதிராக இந்தியா விளையாடிய போது இரண்டு புதிய வீரர்கள் களமிறக்கப்பட்டனர். ஒருவர் சவுரவ் கங்குலி. இன்னுமொருவர் ராகுல் ட்ராவிட். முன்னவர் வங்கதேசம் பின்னவர் கர்நாடக மாநிலம்.

இந்த இருவரும் தமக்கு தந்த பணியை செவ்வனே செய்தனர். கங்குலி ஓய்வும் பெற்றுவிட்டார். ஆனால் ட்ராவிட் இன்னமும் விளையாடிக் கொண்டிருக்கும் அதேவேளை அவருக்கான ஓய்வு நேரம் நெருங்குகிறதா? அல்லது கட்டாய ஓய்விற்கு தள்ளப்படுவாரா என்ற பல கருத்துக்கள் எழுந்துள்ளது.

இந்தியாவின் துடுப்பாட்ட சுவர் (BATTING WALL) என்று எல்லோராலும் அழைக்கப்பட்டவர். நிதானமாக தொடங்குவார். பின்னர் களத்தில் இவர் நின்றால் ஓட்டம் ஏறுவது தெரியாது. அதிரடியும் இல்லை. ஆமை வேகமும் இல்லை. நிதானமாக ஓட்டங்களை குவித்து எதிரணியை மிகுந்த சிரமத்திற்குள்ளாக்குவார். இவரால் இந்தியா பெற்ற வெற்றிகள் ஏராளம். ஏன் தனித்து நின்றே வெற்றிகளைக் குவித்து இருக்கிறார். அப்துல் ஜபார் தமிழில் அழகாக சொல்வதானால் மிகச்சிறந்த மட்டையாளர்.

சிறிதுகாலமாகவே ட்ராவிட் உடைய மட்டை ஓட்டங்களை சேகரிக்க தவறுகிறது. காரணம் கண்டு பிடிக்க முடியவில்லை. இது ட்ராவிட்டுக்கு மட்டுமல்ல ரசிகர்களுக்கும் ஏன் தேர்வாளர்களுக்கு கூட சங்கடமாகத்தான் இருக்கிறது. அற்புதமான வீரர். Class is Permanent. Form is Temporary. ட்ராவிட் இடம் எப்போதும் தரம் இருக்கிறது. ஆனால் இப்போது நேரம் இல்லை. நன்றாக ஆடக்கூடியவர். ஆனால் இப்போது முன்பு மாதிரி இல்லை. 2006 ம் ஆண்டு தென்னாபிரிக்காவிற்கான் சுற்றுப்பயணத்தில் இருந்து இந்த பிரச்சினையை ட்ராவிட் எதிர் கொள்கிறார் என்றுதான் கூறவேண்டும். அதற்கு முன்னதாக மேற்கிந்தியாவிற்கெதிரான தொடரை வராலாற்று வெற்றியாக படைத்ததில் ட்ராவிட்டின் துடுப்பாட்டமும் தலைமைத்துவமும் காரணம்.

2006 இறுதியில் தென்னாபிரிக்கத் தொடரில் இருந்து கடைசியாக சென்னையில் நடந்த இங்கிலாந்திற்கெதிரான போட்டி வரை உள்ள தொடர்களின் பெறுபேறுகள் கொண்ட அட்டவனை கீழே உள்ளது.


மேலுள்ள அட்டவணையில் இருந்து ட்ராவிட்டின் மோசமான பெறுபேறு பற்றி எல்லோரும் தெரிந்து கொள்ள முடியும். எல்லா காலத்திலும் எந்த துடுப்பாட்ட வீரனும் சாதிக்க முடியாதுதான். லாறா, சச்சின், பொண்டிங், சங்ககார போன்றவர்களும் சொதப்பித்தான் இருக்கிறார்கள். இவர்களை நினைத்து ரசிகர்களும் கவலைப்பட்டிருக்கிறார்கள். ஆனால் இரண்டு தொடர்களுக்கு பிறகு தேறி விடுவார்கள். இப்போது ட்ராவிட் அப்படியும் இல்லை. போர்மில் இல்லை என்று சொல்லலாம். ஆனால் அவரின் தரமான விளையாட்டிற்காகத்தான் இவ்வளவு நாளும் அணியில் சேர்த்திருந்தார்கள். அவர் மீண்டு வருவார் மீண்டு வருவார் என்றால் ட்ராவிட் மீண்டும் மீண்டும் ஏமாற்றுகிறார்.

தென்னாபிரிக்காத் தொடருக்கு முன்னர் அவரது சராசரி 58.75 இப்போது அவரைப் பொறுத்தவரைக்கும் அதளபாதாளம். முன்பு தொடக்கத்திற்குத்தான் அதிக பந்துகளை சந்திப்பார். ஆனால் போகப்போக ஓட்டங்களை குவித்து 100 பந்துக்கான ஓட்டவீதத்தை(Strike Rate)நன்றாக பேணுவார். இப்போது துடுப்பாடும் போது கூட தெரிகிறது. தற்காப்பு ஆட்டமும், பதட்டத்துடனும் கூடிய நிதானமும் கொண்டதாக உள்ளது. சில வேளைகளில் ட்ராவிட் தானா இப்படி துடுப்பெடுத்தாடுகிறார் என்று எண்ணத்தோன்றுகிறது. ஒரு துடுப்பாட்ட சுவர் சரிகிறது என்று எல்லோருக்கும் கவலை.

தேர்வாளர்களின் தலைவராக இப்போது ஸ்ரீகாந்த். இவர் மனது வைத்தாலே ஒழிய, மற்றபடி இந்த துன்ப நிலை நீடித்தால் ட்ராவிட் அடுத்த தொடருக்கு தெரிவு செய்யப்படுவது சந்தேகமே. ஏனெனில் புள்ளிவிபரங்கள் எல்லாம் ட்ராவிட்டுக்கு எதிராகவே உள்ளன. வரப்போகின்ற போட்டிகள் இந்தியா, இங்கிலாந்தை விட ட்ராவிட்டுக்கு கடும் சோதனையாக இருக்கும். சென்னையில் வெற்றி பெற்றதால் வெற்றி அணியை (WINNING COMBINATION) குலைக்காமல் விளையாடுவார்கள். ஒருவேளை தோற்றிருந்தால் நிலைமை வேறுமாதிரியாக மாறி இருக்கும்.

நல்ல துடுப்பாட்ட வீரனை இந்திய அணி இழக்கிறது என்ற வருத்தம் எல்லோரிடமும் உள்ளது. அதே நேரத்தில் வெளியே நிறைய இளைய வீரர்கள் காத்துக்கொண்டிருக்கிறார்கள். ரோகித் சர்மா, விராத் கோழி, விஜய், பத்ரிநாத், சுரேஷ் றைனா என நிறையவீரர்கள். ட்ராவிட் போல இவர்கள் எல்லாம் வருவார்களா? ட்ராவிட் இடத்தை நிரப்பமுடியுமா? என்றால் வாய்ப்பு கொடுத்துப்பார்த்தால்தான் தெரியும். அதேநேரத்தில் டோனியும் இளம் அணி இளம் அணி என அடம்பிடிப்பதால் தேர்வாளர்களும் அவர் பின்னால் நிறக நேரிடுகிறது. காரணம் இந்தியாவிற்கு எதிர்பாராமல் நிறைய வெற்றிகளைத் தேடித்தந்து விட்டார்

ஒருநாள் அணி. கதையே வேண்டாம் கனவில கூட ட்ராவிட் அந்த இடத்தை நினைக்க முடியாத அளவிற்கு துடுப்பாட்ட வரிசை உள்ளது. இப்போது பந்து ட்ராவிட்டின் துடுப்பை நோக்கி வீசப்படுகிறது. லாவகமாக தட்டிவிட்டு நான்கு ஓட்டத்தைப் பெற்று அணிக்குள் இருப்பாரா? அல்லது கிளீன் போல்ட் ஆகி வாழ்வை முடித்துக்கொள்வாரா? பொறுத்து இருந்து பார்ப்போம்.

(மீண்டும் வருவேன் என்கிறாரா? அல்லது போகிறேன் என்கிறாரா?)
மீண்டு வரவேண்டும் அதுதான் எல்லோர் விருப்பமும். மீண்டும் வரும் நேரத்தில் அவரைப் பற்றி மீண்டும் எழுதவேண்டும் என்றும் ஆவலாக இருக்கிறது.

பொறுப்பற்ற ஆட்டம்....!

இந்தியா-இங்கிலாந்து அணிகளுக்கு இடையிலான 4வது போட்டி நேற்று பெங்களூர் சின்னசுவாமி மைதானத்தில் பகலிரவு ஆட்டமாக நடைபெற்றது. இதில் இந்தியா டக்வேர்த்-லூயிஸ் முறையில் 19 ஓட்டங்களால் வென்றது தெரிந்ததே.

உண்மையில் இந்தியா இந்த தொடர் முழுவது நன்றாக விளையாடி வரும் நிலையில் இங்கிலாந்து அணியும் மோசமாகவே விளையாடி வருகிறார்கள்.

நேற்றைய ஆட்டம் இங்கிலாந்திற்கு வாழ்வா சாவா போட்டி. என்னைப் பொறுத்தவரை இங்கிலாந்து அணியிடம் இருந்த போட்டியை அவர்களாகவே இந்தியாவிடம் தாரைவார்த்துக் கொடுத்தனர்.

டக்வேர்த்-லூயிஸ் முறையில் இங்கிலாந்தின் வெற்றி இலக்கு 198. அதுவும் 22 ஓவரில். இது ஒரு கடின இலக்குத்தான். ஆனால் 20-20 போட்டிகளில் நன்றாக பரிச்சயம் உள்ள வீரர்களுக்கு இது ஒரு பொருட்டல்ல. ஆரம்ப ஜோடிகள் பெல்-போபரா இணை மிக மோசமாக விளையாடியது. இதுதான் போட்டியின் திசையை மாற்றியது என நான் கருதுகிறேன். 6 ஓவரில் வெறும் 21ஓட்டங்கள் தான். பீட்டர்சன் என்ன நினைத்தாரோ தெரியாது. ஆரம்ப இணையின் விளையாட்டு உத்தி தாக்குதல் பாணியில் அமையவில்லை. அடித்து ஆட முயன்று ஆட்டமிழந்தால் யாரும் எதுவும் சொல்ல மாட்டார்கள். அடிக்க முனைந்து ஆட்டமிழந்தார் என்பர். ஆனால் அவர்கள் இருவரும் அந்த உத்திக்கு எத்தணிக்கவே இல்லை. போபரா ஆட்டமிழக்க பின்னால் வந்த ஓவே ஷா வும் மெதுவாகவே ஆரம்பித்தார். இவை பின்னால் வந்த வீரர்களுக்கு அழுத்தம் கூட்டுவதாகவே அமைந்தது.

அருமையான வாய்ப்பை இங்கிலாந்து வீரர்கள் பயன்படுத்த தவறிவிட்டனர். இந்தியாவிற்கு 5வது பந்து வீச்சாளர் பகுதிநேரப்பந்து வீச்சாளரே. அதையும் அவர்கள் பெரிதாக பயன்படுத்தவில்லை.

பீட்டர்சன் துடுப்பாடும் போது பட்தட்டம் தெரிகிறது. அணித்தலைவர் என்ற சுமை அவரது துடுப்பாட்டத்தை இந்தத்தொடரில் வெகுவாகவே பாதித்துவிட்டது. 3ம் இலக்க வீரராக பிளிண்டொவ் இனை இறக்கி பீட்டர்சன் கொஞ்சம் பின்னாலே வந்திருக்கலாம். அவர் செய்கிறாரோ இல்லையோ ஏனைய வீரர்களுக்கு மனதில் தைரியத்தை கொணர்ந்திருக்கும்.

அதிர்ஷ்டம் இல்லை என்பதைவிட இங்கிலாந்து போட்டியில் சிறந்த திட்டமிடல் இல்லாததால் கோட்டை விட்டது. மீண்டு ஒரு வெற்றி இந்தியர்க்கு. இது தொடரை அவர்கள் வசமாக்கிவிட்டது.

மீண்டும் ஒரு கிரிக்கட் பதிவில்........!