தென்னாபிரிக்கா VS அரையிறுதி

மீண்டும் ஒரு அரையிறுதிப்போட்டி. மீண்டும் அதிலே தென்னாபிரிக்கா. மீண்டும் ஒரு பரிதாப தோல்வி. இரண்டாவது உலக 20-20 கிண்ணத்துக்கான போட்டித்தொடரில் தோல்வியே இல்லாமல் வலம் வந்து பாகிஸ்தானிடம் இன்று மண் கவ்வி பரிதாபமாக வெளியேறுகிறது.

1992 இல் வருணபகவானின் வரம் சாபம் ஆனதால் ஒரு பந்தில் 22 என்ற ஒரு நினைத்துப்பார்க்க முடியாத இலக்கால் தோல்வியுற்றது. 1999 உலகக் கோப்பையில்

லான்ஸ் குலூஸ்னர் ஏமாற்ற தென்னாபிரிக்காவின் கோப்பைக் கனவு தகர்ந்தது. 2003 உலகக் கோப்பையில் இலங்கை அணிக்கு எதிராக மழை குறுக்கிட்டது.
ஆனாலும் அவர்கள் கணித்த டக்வேர்த்-லூயிஸ் கணிப்பில் ஏற்பட்ட தவறால் தொடரில் தொடர்ந்து பயணிக்க முடியவில்லை. வலுவான அணியாக இருந்தும் கோப்பையை தட்டிசெல்லக்கூடிய அணி என்று எதிர்பார்த்தாலும் அவர்களை ஏனோ ஒரு காரணி தடுத்தே வந்தது. இம்முறை அப்படி அல்ல என்று நினைக்கிறேன்.

150 என்ற இலக்கு. எட்டக்கூடிய ஓட்ட எண்ணிக்கை. ஏனோ அவர்கள் வெற்றியை பாகிஸ்தானுக்கு தாரை வார்த்து கொடுத்தனர். கிறீம் ஸ்மித் அணித்தலைவர் என்ற ரீதியில் சில விமரிசனங்களுக்கு ஆளாகிறார் இங்கே.

12 ஓவர்களுக்கு பிறகு உமர் குல் வந்து மிரட்டுவார் என்பதை கணிக்கத்தவறி விட்டாரோ என்று எண்ணத்தோன்றுகிறது. அதே நேரத்தில் எனது அபிப்பிராயப்படி ஜேபி டும்னி T20 போட்டிகளுக்கான ஒரு விசேட வீரர் இல்லை என்றே சொல்வேன். இங்கே 100 என்ற ஓட்டவிகிதம் வைத்திருப்பதை பெரிய விடயமாக கருத முடியாது. அடித்தாடும் ஆற்றல் கொண்டவர்கள் வேண்டும். டும்னியை களம் இறக்கிய இடத்திற்கு அல்பி மோர்க்கல் வந்திருக்க வேண்டும். தொடர்ந்து பௌச்சரும் பின்னர் வன்டர் மேவ் களமிறங்கியிருக்க வேண்டும். இந்த 3 பேரும் டும்னியை விட அடித்தாடும் வல்லமை படைத்தவர்கள்.

ஆட்ட முடிவில் நசீர் ஹுசைன் இன் "அல்பி மோர்க்கல் துடுப்பாட்ட வரிசையில் முன்னாலே வரவேண்டும் என்று நினைக்கிறீர்களா? " என்ற கேள்விக்கு சரியான பதில் வராமல், ஏதும் ஆட்டமிழப்பு நடந்திருந்தால் அவருக்கு ஆட வாய்ப்பு கிடைத்திருக்கும். தூரதிர்ஷ்டவசமாக அப்படி நடக்கவில்லை என்றார். உண்மையில் அல்பி மோர்க்கல் 4 அல்லது 5 ம் இலக்க துடுப்பாட்ட வீரராக களம் இறங்கியிருக்கலாம். அப்படி நடந்து இருந்தால் நிலைமை மாறி இருக்கும்.

கிறீம் ஸ்மித், இவரது துடுப்பாட்டம் T20 போட்டிகளில் மோசமாகவே உள்ளது. ஓட்டங்கள் குறைவாக பெற்றாலும் அவர் அதிக பந்துகளை தின்றே இந்த பெறுதிகளை பெற்றுக் கொள்கிறார். இது பின்னால் வரும் வீரர்களுக்கு சுமையாக இருக்கிறது. ஸ்மித் இனுடைய மோசமான துடுப்பாட்டம் ஐபிஎல் எல் இருந்தே ஆரம்பிக்கிறது. அங்கே ராஜஸ்தான் றோயல்ஸ் இனுடைய தோல்விகளுக்கு ஸ்மித் பெரிதாக துடுப்பெடுத்தாடாமை காரணம் என்றால் மிகையல்ல. 2007 ம் ஆண்டு போட்டிகளுக்கு பின்னர் ஸ்மித் சர்வதேச போட்டிகளில் ஒரு அரைச்சதத்தை தன்னும் பெறவில்லை. இத்தனைக்கும் அவர் ஆரம்பத்துடுப்பாட்ட வீரர். அவருக்கு நீண்ட நேரம் துடுப்பெடுத்தாட வாய்ப்பு கிடைத்திருக்கும். சாதிக்க தவறிவிட்டார். தென்னாபிரிக்கா வெற்றிகளை பெறுவதால் அவர் மீதான விமரிசனம் குறைவாகவே உள்ளது.

ஸ்மித் ஒரு சுற்று பருத்திருக்கிறார். அவரால் முன்பு போல களத்திலே லாவகமாக விளையாட முடியவில்லை என்று கருதுகிறேன். உடல் எடை அவருக்கு பெரும் சிக்கலாக இருக்கலாம் என்பது எனது கருத்து. விழுந்து களத்தடுப்பு செய்ய சிரமப்படுகிறார். விக்கட்டுக்கு இடையில் ஓட முற்பட்டு எதிர்முனை வீரர் வேண்டாம் என்கிற போது திரும்பி வர சிரமப்படுகிறார். வயது 28. இடையிலேயே இவரது கிரிக்கட் காலம் முடியுமா அல்லது தொடருமா என்று...!

பாகிஸ்தான் ஒரு இமாலய இலக்கை நிர்ணயிக்கும் என்று எண்ணிய போது அப்ரிடியின் ஆட்டம் இழப்புடன் அவர்களது ஓட்டக் குவிப்பை தென்னாபிரிக்கா கட்டுப்படுத்தியது. பாகிஸ்தானிலும் சொயிப் மலிக் பெரிதாக சோபிக்கவில்லை. யூனிஸ்கான் இடையில் அதிரடி என எண்ணி முட்டாள்தனமாக பாவெட் அலாம் இடம் பந்தினை வீசச்சொல்லி கொடுக்க கலிஸ் அதனை அற்புதமாக தமக்கு சாதகமாக மாற்றி 18 ஓட்டங்களை பெற்றார். ஏன் இப்படி இடையில் யூனிஸ் குழம்பினாரோ தெரியாது. அதே போல 20 ஓவரை உமர் குல் இடம் கொடுத்து 19வது ஓவரை மொஹமட் அமீர் இடம் கொடுத்திருக்க வேண்டும் என நான் கருதுகிறேன். காரணம் அமீர் 17 வயதான பாலகன். இதுதான் அவருக்கு கன்னி தொடர். அனுபவமற்ற வீரர். பொறுத்த நேரம். ஆனால் அவர் இறுதி ஓவரை வீச வரும் போது 23 ஓட்டங்கள் தேவை. அது கொஞ்சம் ஆறுதலாக அவருக்கு இருந்திருக்கும். ஆனால் கிரிக்கட்டில் எதுவும் நடக்கலாம். யூனிஸ்கான் நினைத்திருப்பார் 19வது ஓவரில் உமர் குல் வீசி ஓட்டங்களை கட்டுப்படுத்தினால் 20 வது ஓவர் வீசுபவருக்கு பதட்டம் இருக்காது என்று. ஆனால் உமர் குல் இனை பொறுத்தவரை ஒரு ஓவருக்கு 5 ஓட்டங்கள் தேவை என்றாலும் அதை தடுக்கக்கூடிய அளவிற்கு வல்லமையுள்ளவராக இருந்தார். எல்லாம் பாகிஸ்தானை வெற்றி பெற செய்தது. ஆட்ட நாயகன் சந்தேகமே இல்லாமல் அப்ரிடி. இப்பொழுதெல்லாம் அவரை பந்துவீச்சுக்காகத்தான் எடுக்கிறார்கள். அவரும் தனக்கு பந்துவீச்சில் தானாம் கூட விருப்பம் என்றும் சொல்லிவிட்டார். காற்றுள்ள போதே தூற்றிக்கொள்ளும் நல்ல அரசியல்வாதி.

வெல்ல வேண்டிய போட்டியை தென்னாபிரிக்கா தன்னாலேயே தோல்வியை தழுவியது. மீண்டும் ஒருதடவை அரையிறுதியில் தென்னாபிரிக்கா தோற்று தனக்கான ஒரு அனுதாபத்தை சுமந்து நிற்கிறது. தென்னாபிரிக்காவிற்கும் அரையிறுதிக்குமான போட்டியில் அரையிறுதியே மீண்டும் ஒரு தடவை வென்றுள்ளது.

தோனியும் தோல்விகளும்....!

ஒரு போட்டி என்று வந்துவிட்டால் ஒருவர் தோற்றுத்தான் ஆக வேண்டும். அதுதான் நியதி. எல்லாப் போட்டிகளிலும் வெற்றி பெற முடியாது. வெற்றிக் கதாநாயகனாக வலம் வந்த தோனி இப்போது அண்மைக்காலமாக சரிவுகளை சந்தித்து வருகிறார். ஒரு தொடர் தோற்றதும் இதனை சொல்கிறோம் என்று யாரும் எண்ண வேண்டாம். தோனியை எல்லோரும் தலைக்கு மேல் வைத்துக் கொண்டாடினார்கள். அப்பா நீதான் எங்கள் தெய்வம். எம்மை காக்க வந்த காவல் வீரன் என்பது போல வாழ்த்தியும் புகழ்ந்தும் தள்ளினர். ஊடகங்கள் அவரின் புகழை பலூனை ஊதி ஊதி தள்ளுவது போல பெரிதாக்கினர். இன்று வசை பொழிய தொடங்கிவிட்டனர். அதிர்ஷ்டம் தோனியை கைவிட ரசிகர்களும் கைவிட தொடங்கி விட்டார்கள் போலும். இங்கிலாந்துடனான போட்டிக்கு பின்னர் எரித்த கொடும்பாவி ரசிகர்களின் எண்ணங்களை சொல்லும்.

தோனியால் இந்தியா பல வெற்றிகளை பெற்றது. அவுஸ்திரேலியாவில் நீண்ட ஒரு பெரிய இடைவெளிக்கு பின்னர் ஒருநாள் போட்டித்தொடரை கைப்பற்றி கோப்பையை கொண்டு வந்தார். ஆனால் அதற்கு பின்னர் இரண்டு இறுதிப்போட்டிகளில் சொதப்பிவிட்டார். ஆனால் சில தொடர்களில் இந்தியாவிற்கு வெற்றியை குவித்தார். இப்போது நிலைமை கொஞ்சம் தலைகீழ்.

ஐபிஎல் போட்டிகளிலும் தோனியின் சென்னை சுப்பர் கிங்ஸ் ஆரம்பத்தில் சரிந்தே இருந்தது. பின்னர் ஒருவாறாக தேறி அரை இறுதி வரை வந்தது. ஆனால் தோனியின் துடுப்பாட்டம் மந்தமாகவே காணப்பட்டது. இப்பொழுது அவரது அதிரடிகள் பெரிதாக இல்லை. காரணம் தெரியாது(பால் கிடைப்பதில்லை போலும்).

அவர் ஒரு அதிரடி துடுப்பாட்ட வீரர். அவ்வளவே. நல்ல துடுப்பாட்ட வீரரா? யோசித்துத்தான் சொல்ல வேண்டும். அவரது அடிகளை பார்ப்பவர்களுக்கு தெரியும், சிலவேளைகளில் பாடசாலை மட்ட வீரர்கள் ஆடுவது பார்க்க சிறப்பாக இருக்கும். பலம் ஒன்று உள்ளது. அது மட்டும்தான் அவருக்கு அதிக அளவில் கை கொடுக்கிறது. 20-20 போட்டிகளில் அவரின் 100 பந்துகளுக்கான ஓட்டவிகிதமும் அண்ணளவாக 100 தான். பெரிதாக துடுப்பாட்டத்தில் சாதிக்கவில்லை என்று சொல்லலாம். சில வீரர்களின் முட்டாள்தனமான முடிவு சில போட்டிகளை மாற்றி எதிரணிக்கு வெற்றியை தாரை வார்த்து கொடுக்கும். அதன்மூலம் சிலர் புகழ் அடைந்தனர் என்பதற்கு தோனியின் முதலாவது 20-20 போட்டி கோப்பை இறுதி போட்டியை சொல்லலாம். (இப்படித்தான் 1999 ல் குலூஸ்னர் பார்த்த அடி முட்டாள்தனமான செயல் தென்னாபிரிக்காவை பாதித்தது).

இந்தியாவின் பெரிய பலமே துடுப்பாட்டம்தான். அதுவும் பெரிதாக இந்த தொடரில் சோபிக்கவில்லை. தோனியோடு சேர்ந்து அவருக்கு பின்னால் இளம் அணி இளம் அணி என்று அலைந்த தேர்வாளர்கள் இனி என்ன செய்வார்கள்.

இதற்கிடையில் விரேந்தர் ஷேவாக் உடன் முறுகல் என்ற கதையும் உள்ளது. இது எவ்வளவு உண்மை என்று தெரியாது. எல்லாம் சேர்ந்து தோனியை வாட்டி வதைக்கின்றன. களத்தில் எடுக்கும் முடிவுகளில் குழப்பம். அணித்தெரிவுகளில் குழப்பம் (இதை விட நல்ல அணி எவ்வாறு எடுப்பது. தெரிந்தவர்கள் சொல்லுங்கள்) என்றெல்லாம் விமரிசனம் பலவாறாக உள்ள நிலையில் தோனி நிலை கவலைக்கிடமே. ஆனால் அவருக்கோ அவர் தலைமைப்பதவிக்கோ இப்போதைக்கு எந்த ஆபத்தும் அண்மையில் இருக்காது.

இந்த வலைப்பூக்களில் ஒரு பதிவிலே தோனிக்கு அதிர்ஷ்டம் மட்டுமே உள்ளது என்று எழுதிய ஒருவர், பின்னர் சொன்னார் இதை யாரும் ஒப்புக்கொள்ள மாட்டார்கள். என்னை அடிக்க வருவார்கள். ஏன் வம்பு நான் ஒதுங்குகிறேன் என்றார். அவர் கருத்தை நான் வழிமொழிகிறேன்.

அடுத்து மேற்கிந்திய தொடர். அதுவும் அவர்கள் மண்ணில். பார்ப்போம் சாதிப்பாரா என்று. இது ஒன்றும் தோனிக்கு எதிராக எழுதிய பதிவல்ல. ஆனால் அவரை தலையில் தூக்கி வைத்து ஆடுபவர்களுக்கான பதிவு. அவ்வப்போது தோல்விகள் வரத்தான் செய்யும். தாங்கித்தான் ஆக வேண்டும். விமரிசங்கள் கடுமையாக வரும். புகழ்ந்து புகழ்ந்து எழுதிய ஊடகங்கள் தோல்வியை சந்தித்த உடன் காலில் போட்டு மிதிப்பது போல எழுதுவார்கள். கங்குலியிடம் இருந்து இதை படிக்க வேண்டும். எனவே இந்தியா நன்றாக விளையாடக்கூடிய அணி. அவர்களைப்போல அணி உலகில் இல்லை. ஏனெனில் எப்பொழுது வெல்வார்கள். எப்பொழுது கவிழ்ப்பார்கள் என்று அறுதியிட்டு கூற முடியாது. எதிர்பாராத நேரத்தில் அடித்து நொருக்கி ஆட்டம் போடுவார்கள். ஆனால் எதிர் பார்க்கின்ற நேரத்தில் காலை வாரிவிடுவார்கள். அதுதான் இம்முறையும் ரசிகர்களுக்கு நடந்துள்ளது.

இதுதான் கிரிக்கட். அதிலும் இதுதான் இந்திய கிரிக்கட்...!

சிங்கப்பூர் செண்பக விநாயகர்

'திரைகடலோடியும் திரவியம் தேடு' என்ற முதுமொழி யாருக்கு பொருந்துகிறதோ இல்லையோ ஈழத்தமிழனுக்கு மிக அதிகமாகவே பொருந்தியுள்ளது. இன்று தமிழன் இல்லாத நாடும் இல்லை, தமிழனுக்கு என்று ஒரு நாடும் இல்லை என்ற நிலை. மொழியால் கலாசாரத்தால் தனக்கென ஒரு தனியிடம் வைத்திருந்தும் மற்றவர்களோடு ஒன்றித்து வாழவேண்டிய ஒரு சூழல். இருந்தும் அந்த ஏக்கமும் தாக்கமும் இன்னும் அடிமனதில் இருப்பது எல்லோருக்கும் மகிழ்ச்சியே. இப்படி கடல் கடந்து செல்வம் சேர்க்க வேண்டும் என்ற அவாவில் சகல நாடுகளுக்கும் அடி எடுத்து வைத்து வளம் குவிக்கத்தொடங்கினான். அந்த வரிசையில்தான் சிங்கப்பூரும் தமிழனை ஏற்று தன்னகப்படுத்தி கொண்டது.
தூய்மை, ஒழுக்கம், கட்டுக்கோப்பு இவற்றிற்கு பெயர்போன நாடு சிங்கை. அழகிய தீவு. செல்வம் கொழிக்கிறது. பல்லின மக்களும் ஒற்றுமையாகவும் அமைதியாகவும் வாழும் உன்னத தேசம். எமது மக்கள் இங்கும் தமது கால்களை ஊன்றி பின்னர் அகலக்கால் பதித்தனர். ஈழத்தமிழரை பொறுத்தவரை அநேகர் இந்துக்கள். 'கோயில் இல்லா ஊரில் குடியிருக்க வேண்டாம்' என்ற வாக்குக்கு அமைய வாழ்ந்தவர்கள். கோயில் இருக்கும் இடத்தில் தாம் இருக்க வேண்டும். அல்லது தாங்கள் இருக்கின்ற இடத்தில் ஆலயம் அமைக்க வேண்டும். இதுதான் அவர்கள் சிந்தை. இறைவனுக்கு அள்ளி அள்ளி கொடுத்த இனம். தண்ணீரும் இறைக்க இறைக்கத்தான் ஊறும் என்பது போல் வாரி வாரி வழங்கி பொருள் குவித்தனர்.

ஆரம்ப காலத்தில் சிங்கப்பூரை 'குட்டி யாழ்ப்பாணம்' என்று அழைப்பார்களாம். (கடவுளே இப்ப முடியுமா...?). இங்கு வாழ்ந்து வந்தவர்கள் தாம் வழிபடவேண்டும் என்று எண்ணிய போது, யாரோ ஒருவருக்கு எங்கோ குளத்திற்கு அருகில் கிடைத்த விநாயகர் விக்கிரகம் ஒன்றை கொண்டு சிறிய ஆலயத்தை காத்தோங் நகரில் 'சிலோன்' சாலையில் உருவாக்கினர்.
இதுதான் இன்று பெயரோடும் பூகழோடும் விளங்கும் சிங்கப்பூர் செண்பக விநாயாகர் ஆலயம். இது இடம்பெற்றது 1870 காலப்பகுதிகளில். பின்னர் இந்த ஆலயம் 1910 ம் ஆண்டு காலப்பகுதிகளில் சிங்கப்பூர் இலங்கைத் தமிழர் சங்கம் என்ற அமைப்பின் கீழ் பரிபாலிக்கப்பட்டது. அது இன்றும் தொடர்கிறது. தமிழனுக்கு எங்கும் சோகம்தான். ஏனெனில் இந்த ஆலயமும் 1942 ம் ஆண்டில் இரண்டாம் உலகப்போரில் தாக்குதலுக்கு உள்ளாகி பலத்த சேதமடைந்தது. மூல விக்கிரகம் தவிர அனைத்தும் நிர்மூலமானது எனலாம். (இங்கும் தமிழினம் சோதனை சந்தித்துத்தான் சாதனை கண்டது. அங்கும்...?)

மிகுந்த வனப்பு மிக்க அழகுடன் தோற்றம் அளிக்கும் இந்த ஆலயம் சிங்கையின் அழகை மேலும் ஒரு படி செழுமையுற வைத்துள்ளது. ஈழத்து ஆலயங்களில் நடைபெறுகின்ற ஆகமவிதிப்படியே இங்கும் பூசை வழிபாடுகள் நடைபெறுகின்றது. இது ஒரு வெளிநாட்டு ஆலயம் என்று சில பரிமாணங்களில் தோன்றினாலும் வழிபடுகின்ற போது எமக்கு எல்லாம் அந்த மண்வாசனையை கொண்டு வரும். அல்லது எம்மை அந்த மண்வாசனைக்கு அழைத்துச் செல்லும். அழகிய தூலலிங்கம் என்ற சொல்லப்படுகின்ற இராசகோபுரம், அழகிய மண்டபங்கள், விநாயகபெருமானின் எழில்மிகு விமானம், அதிலே தங்க அங்கி, மாபிள் பதித்த தரை, வண்ணமிகு ஓவியங்கள், அந்த ஓவியங்கள் சொல்லும் புராண இதிகாச கதைகள் என செல்வமும் எழிலும் பக்தியும் கொட்டிகிடக்கும் ஆலயமாக காட்சி அளிக்கிறது. இருந்தாலும் ஆலயத்தில் ஒரு அடக்கம் இருக்கிறது. பணிவு இருக்கிறது. பக்தி இருக்கிறது. மனதை பிழியும் ஒரு மாயை இருக்கிறது என்றே சொல்லத்தோணுகிறது. நேரம் தவறாத பூசை. செவ்வந்தி, மல்லிகை, மரிக்கொழுந்து என அழகிய மலர்களால் ஆன மாலைகளும், தங்க ஆபரணங்களும் அணிவிக்கப்பட்ட அருள் ஒழுகும் அற்புத அலங்கார சாத்துப்படி. கோடிக்கண் கொண்டு காணவேண்டிய காட்சிகள். இவை எல்லாம் எனக்கு எப்போதும் நல்லூர்க்கந்தனையே எனக்கு நினைவு படுத்துகின்றன. அலங்காரக் கந்தனின் அழகும் நேரம் தவறாத பூசையும் மீண்டும் சிங்கை செண்பக விநாயகர் ஆலயத்தில் கண்டு மகிழ்ந்தேன்.

பக்தர்கள் அநேகம் ஈழத்தை பூர்வீகமாக கொண்டவர்கள். அவர்கள் ஒன்றுகூடவும் தமது கலாசார பண்பாட்டை வெளிப்படுத்தவும் சிறந்த இடமாக இந்த ஆலயம் விளங்குகிறது. இங்கு பலபல துறைகளில் வேலை பார்த்துக் கொண்டிருக்கும் ஈழத்தை சேர்ந்த இளைஞர்கள் மற்றும் மாணவர்கள் ஒற்றுமையாக இந்த ஆலயத்தில் தொண்டு செய்யும் பாங்கு மனதிற்கு மகிழ்வையே தருகிறது. அவர்களின் பக்திநெறி அல்லது அதன் மீதான பற்று அல்லது ஆன்மீக நாட்டம் எல்லாம் சைவத்துக்கும் தமிழுக்கும் வளமான எதிர்காலம் உள்ளது என்பதில் மிகையில்லை. ஈழத்து நாதஸ்வர தவில் கலைஞர்களின் நாத இசை எல்லாப் பூசைகளுக்கும் உண்டு. இதனை நாம் விரல் விட்டு எண்ணக்கூடிய ஆலயங்களிலேயே காணலாம். தமிழகத்தில் இருந்து வரவழைக்கப்பட்ட ஓதுவார் அவர்களின் திருமுறைப் பாடல்கள் மிக அற்புதமாக இருக்கும். பண்ணோடு இசைக்கும் அவரது பாங்கு பார்ப்பவர்களை பரவசப்படுத்தும்.

இந்தக்காலப் பகுதியில் ஆலயத்தில் வருடாந்த மஹோற்சவம் நடைபெற்றுக் கொண்டிருக்கிறது. மிக அற்புதமான திருவிழாக்கள். அழகாகவும் நேர்த்தியாகவும் ஒழுங்கமைக்கப்பட்டு நேரத்தோடு ஒழுகி நடைபெறுகிறது. இந்தத் திருவிழாவுக்காக ஈழத்தில் இருந்து வரவழைக்கப்பட்ட நாதஸ்வர வித்துவான் பாலமுருகன் அவர்களின் நாதஸ்வர இசை திருவிழாவை மேலும் மேன்மையாக்குகிறது. அவரின் இசைமழையில் அனைவருமே நனைகின்றனர் நாள்தோறும். அற்புதமான நாதஸ்வர இளவல். இவர்தான் நல்லூர் கந்தசுவாமி ஆலயத்தின் ஆஸ்தான வித்துவான். இவை எல்லாம் சேர்ந்துதான் வெள்ளை மணல் மீது உருண்டு வேலவனே என்று அழுத நல்லூர்க்கந்தனின் நினைவுகள் கண்முன்னே நிழலாடுகிறது. (பாலமுருகன் தொடர்பான பதிவு வெகு விரைவில்....). முன்னர் எமது தாயகத்தில் ஒரு நாதஸ்வர அல்லது தவில் வித்துவானை மலேசியா, சிங்கப்பூர் புகழ் என்று அறிமுகம் செய்வார்கள். அந்த சிங்கப்பூர் என்பது இந்த ஆலயத்தினையே குறிக்கும். எண்ணற்ற ஈழத்து கலைஞர்கள் தமது இசைப்பயணத்தின் அங்கமாக இங்கு வருகை தந்திருக்கிறார்கள். இசைவெள்ளத்தில் அனைவரையும் மூழ்கச் செய்திருக்கிறார்கள். இது இன்னமும் தொடர வேண்டும்.
'கொஞ்சும் சலங்கை' படத்தில் இடம்பெற்ற பாடல் இது...'சிங்கார வேலனே தேவா..' இந்தப்பாடல் மூலம் புகழ் உச்சியை அடைந்தவர் எஸ். ஜானகி. நாதஸ்வரம் வாசித்தவர் காருகுறிச்சி அருணாசலம். இந்த பாடல் இங்கே பாலமுருகனின் நாதஸ்வரம் மூலம் உங்கள் செவிகளுக்கு விருந்தாக...!


குறிப்பிட்டு சொல்லப்படவேண்டிய ஒன்று இந்த ஆலயத்தில் நடைபெறுகின்ற சமூக சேவைகள். இந்த ஆலயத்தை மையமாக கொண்டு சிங்கப்பூர் வாழ் தமிழ் சிறார்களுக்கான சைவசமயமும் தமிழும் கற்கும் பள்ளி மற்றும் இசை, நடன பள்ளி என்பதோடு சகல வயதினரும் கலந்து ஆன்மீக அறிவைப் பெறுவதற்கான சைவசித்தாந்த வகுப்புக்கள், ஆலய ஓதுவார்களின் நெறிப்படுத்தலில் பண்ணிசை வகுப்புகள் என தன்னாலான பணிகளை செய்வது போற்றுதற்குரியது. இந்த ஆலயத்தில் அடிக்கடி நடைபெறும் மகேசுவர பூசை (அன்னதானம்) நிறைய மக்களுக்கு மனநிறைவையும் மகிழ்வையும் தருவதோடு ஆறுதலாகவும் உள்ளது.

விக்கினங்கள் தீர்க்கும் விநாயகன் வீற்றிருக்கிறான் சிங்கையில். சைவமும் தமிழும் இன்னும் நன்றாக வாழும் என்பதில் எள்ளளவு சந்தேகமும் இல்லை. மூத்தோர்களின் வழிகாட்டல், இளைஞர்களின் உற்சாகம், சிறுவர்களின் ஆர்வம், யாத்திரிகர்களின் வருகை எல்லாம் இந்த ஆலயத்தை மேலும் மேலும் வளர்ச்சியடைய செய்யும் அதேநேரத்தில் எமது மண்தாங்கி நின்ற கலை கலாசாரம் வேர்விட்டு விழுதுகள் பரப்பி திசையெங்கும் உலாவரும்.

இங்கு நடைபெற்ற ஆருத்திரா தரிசனத்தின் போது சிவகாமசுந்தரி சமேத சிவசிதம்பர நடாராச பெருமானின் திருநடனக்காட்சியும் ஒழுங்கமைக்கப்பட்ட விதமும் என்னை வெகுவாக பாதித்தது என்று சொல்லலாம். இதோ உங்களுக்காக....!